SədaqətƏhmədova Uğrumda canını verərdinmi sən
Keçmişin fədakar cəngavəritək?
Bəzən bunu elə istəyir ürək!
Elə istəyir ki, sevdiyi insan
Göydən ulduzu da qopara bilsin,
Alıb sevdiyini qolları üstə
Hər dərddən-bəladan qurtara bilsin!
Söykənəsən ona – sərt qaya kimi,
İnanasan ona – bir büt sayaraq!
Ən ümidsiz halda,
Mələklər sayaq,
Özünü yetirsin sənə bir anda,
Qoymasın tək-tənha çətin zamanda!..
Ehh, belə bir insan varmı, görəsən –
Səndən olmayanı istəyirəm mən...
2
Hər şeyi birgə yaşadıq –
Cəzasını çəkirəm tək!
Budurmu bərabərlik, azadlıq?
Mən nə daşam,
Nə də mələk...
Səninlə çox çətindir,
Sənsiz daha çətin...
Yəqin
Bu da bir üzüdür
Məhəbbətin –
Unudulmaq
Və unudanı sevmək...
3
Birləşə bilmiriksə,
ayrılaqmı, deyirsən?
Hərəmiz bir tərəfdə
tənhalığın boynuna
sarılaqmı, deyirsən?
Qaçaqmı
duyğuların əzablı enişləri,
şirin yoxuşlarından?
Qorxaqmı
tənələrdən,
doğma, yad insanların
acı baxışlarından?
Budurmu sənin dərdin?
Sevgin bu qədər gücsüz,
bu qədər acizdirsə,
Daha niyə sevirdin?!.
4
Demirəm, Fərhadtək ol dağyaranım,
Demirəm, Məcnuntək sevənlər də var!
Uğrunda alışıb Şamtək yananı
Bir Pərvanə qədər sevsən də olar...
Durur hər təməldə daşı Sevginin,
Tarixlə başlanır yaşı Sevginin!
Bu köhnə dünyada naşı sevgimin
Qədrini azacıq bilsən də olar...
Hər vaxt anılsa da böyük sevgilər,
Sevmək xoş deyildir sevilmək qədər!
Demirəm, yüz kərə iltifat göstər –
Bircə yol“Sevirəm!”desən də olar...
5
Qadın nə istəyir –
Bir az məhəbbət,
Ağır zəhmətinə
Bir azca hörmət,
Bir az dolanışıq,
Bir az da diqqət,
Azacıq nəvaziş,
Bir də sədaqət...
Hər şeyin azını
İstəyirik biz –
Onun da çoxuna
Çatmır əlimiz...
