Son günlər internetdə yayılan “Milla” Süd Zavodunun məhsulu ilə bağlı çəkilən reklam ətrafında söz-söhbət səngimək bilmir.
Zavod rəhbərliyinin azvision.az saytına açıqlamasında deyilir: “Son günlər müəyyən internet saytlarında və sosial şəbəkələrdə “Milla” brendinin adına xələl gətirmək üçün müəyyən xoşagəlməz reklam çarxları yayımlanmağa başlanılıb.
Bu reklam çarxlarının yayımlanması şirkətimizin imicinə, mənafeyinə xələl gətirmək üçün hazırlanıb və rəqib şirkətlər tərəfindən bizə qarşı anti-reklamdır. Biz “Milla” zavodu olaraq belə bir reklam çarxını tanımırıq və həmin reklam çarxı bizim tərəfimizdən çəkilib və yayımlanmasına icazə verilməyib”.
Reklamın rejissoru Zaur Qasımlı show.az saytına açıqlamasında şirkət tərəfindən ilk növbədə bu ssenarinin bəyənildiyini deyib: “Həmin şirkətə biz 5-6 ssenari təklif etmişdik. Düzü, mətnlə tanış olarkən düşündüm ki, bu fikir qəti surətdə rədd ediləcək. Ancaq şirkət nümayəndələri məhz bu ssenariyə baxan kimi xeyli güldülər və birmənalı şəkildə bunu təsdiqlədilər. Təbii ki, biz də həmin ssenariyə uyğun reklam çarxı çəkdik.”
Rejissordan bu işinin nə qədər uğurlu olduğunu soruşduqda isə maraqlı cavab alınıb: “Mən işimi layiqincə görmüşəm. Öz işimin arxasında da hər zaman dururam. Reklama yazılan rəylərlə də tanışam. Sadəcə hər kəsin fikrinə hörmətlə yanaşıram. Təəssüf ki, bizim gənclərimiz öz ideyalarını üzə çıxarmaqdan qorxurlar. Tamaşaçının heç vaxt öz fikri olmur. Həmişə bir-birinə baxıb fikir bildirirlər. Guya mentalitet keşiyində durublar. Amma gənclərimiz bir qədər cəsarəti olsalar, öz ideyalarından faydalana bilərlər.”
Reklamda rol alan model Nuridə Əliyevanın seçilməsi də “Milla”nın nümayəndələrinin göstərişi ilə olub. N. Əliyeva son vaxtlar çılpaq fotoları ilə medianın gündəmində olub.
“Süd məhsuluna olan münasibət dəyişəcəkmi?” sualına isə rejissor “mən işimi peşəkarcasına gördüm. Məhsul kifayət qədər reklam olundu. Belə deyirlər ki, antireklam özü də reklamdır” - cavabını verib.
Rejissor onu da bildirib ki, iki reklam çarxı çəkilib. İkincisi də bu yaxınlarda təqdim olunacaq. Müzkirəyə səbəb olan reklam çarxı isə televiziyalara təqdim olunmayıb. İnternetin daha sürətli inkişaf etdiyi bir dövrdə buna ehtiyac duyulmayıb.
Mehriban Zeynalova reklam çarxlarına qadın bədənlərinin çəkilməsinin ilk olmadığını da söylədi. Onun sözlərinə görə, yaxınlarda taxta-şalban şirkəti öz məhsullarını çılpaq qadın fotoları ilə nümayişə çıxarıb: “Buna ciddi şəkildə etiraz edirik! Etirazımızı davam etdirəcək - Sahibkarlar Konfederasiyasına da bununla bağlı müraciət edəcəyik”.
Doğrusu, rejissorun fikrinin - bəlkə də onun yox, reklamı sifariş edən şirkətin - reklam çarxında məhsulu tanıtmaq, yoxsa onun anti-reklamını etmək olduğunu biz də anlaya bilmədik. Məqsəd həqiqətənmi markanın imicini yüksəltmək olub? Bu suala cavab almaq ümidilə.
