Şuşada Vaqif Poeziya Günləri çərçivəsində Aşıq Ələsgərin vəfatının 100 illiyinə həsr olunmuş "Sözün aşığı – Sazın aşığı” adlı tədbir keçirilib.
Tədbirdə tanınmış ədəbiyyat və incəsənət xadimləri, o cümlədən yazıçı Sarvan Səxavət də iştirak edib.
AZXEBER.COM tədbir çərçivəsində yazıçı Sarvan Səxavətlə həmsöhbət olub.
Müsahibəni təqdim edirik:
- 80 yaşınızda Şuşada olmaq necə hissdir?
- Şuşa elə bir məkandır ki, burada insanın hansı yaşda olmasının heç bir əhəmiyyəti yoxdur. Ana nənəmin evi, ata nənəmin isə məhləsi Şuşada olub. Uşaqlıqda necə hisslər keçirirdimsə, bu gün də eyni hissləri yaşayıram. Şuşa elə bir yerdir ki, insanın duyğularını özü diqtə edir.
- Şuşanı hansı şeiriniz və ya əsəriniz ilə təsvir edərdiniz?
– Müəllifi dəqiq bilinməyən bir şeir var. Mən Şuşanı həmin misralarla təsvir edərdim:
Keçmə şairindən, müğənnisindən,
Könlümü bu yerə bağlar, deyiblər.
Uşağı ağlatsan Qarabağda sən,
Muğamat üstündə ağlar, deyiblər.
Mənim üçün Şuşa elə budur. Çünki muğam mənə görə kosmik bir musiqidir. Şuşa isə mənim üçün sanki yarı kosmik bir məkandır. Hazırda səsimdə problem var. Amma Şuşaya gələndə səsimi yoxlayanda gördüm ki, buranın havası sanki səsimə müalicə edib.
– Bəhram Nəsibovun "Anadır arzulara hər zaman Qarabağ” misrası ilə başlayan məşhur mahnısı var. Bəs sizin bu yaşda həyata keçməyən hansısa arzunuz qalıbmı?
– Qarabağla bağlı artıq heç bir arzum qalmayıb. Çünki ən böyük arzumuz gerçəkləşdi, problem həllini tapdı. Hər zaman deyirdim ki, Qarabağ haqqında ən böyük əsər yazılmalıdır. Amma bu, bədii əsərdən çox, Azərbaycan əsgərinin və Ali Baş Komandanın tarixi xidmətlərinə həsr olunmuş bir əsər olmalıdır. Belə də oldu. Ümumiyyətlə isə mənim yalnız bir arzum qalıb - vahid Azərbaycanı görmək.
Bir məqamı da qeyd edim ki, "Qarabağ şikəstəsi” yalnız Yuxarı Qarabağa aid anlayışdır. Bəhram Nəsibovun bəstələdiyi mahnıda isə söhbət bütövlükdə Qarabağdan gedir. Musiqi baxımından onun coğrafiyası daha genişdir.
Hacıbəy Heydərli
