"Çində vəziyyətim əladır. Burada hər şey məni qane edir".
AZXEBER.COM-un xəbərinə görə sözləri Sportinfo.az-a açıqlamasında "Qarabağ"ın sabiq hücumçusu Dino Ndlovu deyib. 2018-ci ilin yanvarında Ağdam klubundan ayrılan cənubi afrikalı futbolçu hazırda karyerasını Çində davam etdirir. "Xançjou Qrintaun" komandasının formasını geyinən forvard "Qarabağ"ın oyunlarını izləyə bilmir:
"Azərbaycanla Çin arasında 4-5 saatlıq fərq var. "Qarabağ" oynayanda mən artıq yuxuda oluram. Ona görə də matçlara baxmaq imkanım olmur".
Ötən qış Azərbaycan çempionundan qalmaqallı şəkildə gedən Ndlovu sabiq komandasına qarşı heç acıqlı olmadığını bildirib: "Onlara qarşı heç bir kinim yoxdur. Niyə də olmalıdır ki? Həmin ərəfələrdə mətbuatda yazılan xəbərlərin əksəriyyəti həqiqəti əks etdirmir".
Afrikalı hücumçu ilk dəfə "Qarabağ"dan ayrılığının səbəbləri barədə ətraflı danışıb: "Mənim "Qarabağ"da qalmaq istəmədiyimi sizə kim deyib? Yaxşısı budur, 2018-ci ilin yanvarında Türkiyə toplanışına niyə qoşulmadığımı onların özündən soruşun. "Qarabağ"ı ona görə tərk etdim ki, həmin vaxt Çindən gələn təklif həm klub, həm də mən və ailəm üçün sərfəli idi. Odur ki, haqqımda deyilən yalan sözlərə inanmayın. Yeganə səbəb aldığım sərfəli təklif idi. Ona görə də klub rəhbərliyi gedişimə icazə verdi.
Düşünürəm ki, 2 ildir müxtəlif yerlərə yozulan hekayəni danışmağın vaxtı çatıb. 2017-ci ilin dekabrında - Çindən təklif gələndə baş məşqçi ilə söhbət etdim. Müqaviləmdə belə bir bənd var idi ki, yayda müddəti daha bir il uzatmaq olar. Ancaq bu, qarşılıqlı razılıq əsasında olmalı idi. Qurban Qurbanova dedim ki, həm gələcəyim, həm də "Qarabağ"ı sevdiyim, burada uzun illər oynamaq istədiyim üçün 1 illik yox, daha uzunmüddətli sözləşmə istəyirəm. Çünki ailəm də Bakını sevirdi, özümüzü Azərbaycanda xoşbəxt hiss edirdik. Onlara bildirdim ki, əgər məni komandaya layiq bilirsizsə və Çinə getməyimi istəmirsizsə, yeni müqavilə imzalayaq. Halbuki Çindən gələn təklif "Qarabağ"dakı ilə müqayisə olunmayacaq dərəcədə sərfəli idi".
Dino "Qarabağ"ın ona qarşı düzgün hərəkət etmədiyini düşünür: "Danışıqlardan sonra qərar vermək lazım idi. Sonda yeni müqavilə təklif etmədilər və məni satmaq qərarına gəldilər. Ona görə də getdim. Düşünürəm ki, mənə qarşı dürüst hərəkət etmədilər. Amma bu, həyatdır. Mən "Qarabağ"ı, azarkeşləri sevirdim. Heç vaxt pulu motivasiya olaraq görməmişəm. Sadəcə, gələcəyimi təmin etmək üçün yeni müqavilə istəmişdim. Məbləğ isə köhnə sözləşməmdə olduğu qədər idi. Artıq heç nə tələb etməmişdim. "Qarabağ"da qalmaq fikrim olmasaydı, heç vaxt baş məşqçi ilə görüşməz və öz şərtlərimi ona bildirməzdim. Həmin vaxt 3 real təklifim var idi. Ancaq kluba, azarkeşlərə olan sevgimə görə baş məşqçi ilə danışdım, ona öz vəziyyətim barədə məlumat verdim. Onlar isə açıq şəkildə məni komanda üçün vacib saymadılar. Elə bildilər ki, hər şeyi pula görə edirəm. Ona görə də "Qarabağ"dan ayrıldım və hazırda oynadığım ölkədə çox xoşbəxtəm".
