Qış Universitetində "qeyri-həyat sığortası" mövzusunda görüş keçirildi
GƏNCLİK
15:03 13.02.2012
2048
Qış universitetinin 3-cü günü “Qarant Sığorta” ASC və “Atəşgah Sığorta” ASC-nin rəsmiləri Eldar Abbasov və Əkbər Mədətli layihənin qonağı olmuşlar. Maliyyə Nazirliyinin Dövlət Sığorta Nəzarəti Xidmətinin əməkdaşı və “Gənc Liderlər Üçün Qış Universiteti-Sıöortalı gələcək” layihəsinin meneceri Orxan Bayramovun iştirakı ilə “Qeyri–həyat sığortası” mövzusunda keçirilən görüş ilk öncə sığorta şirkətlərinin təqdimatlarının nümayişi ilə başlamışdır. "İrəli"dən AZXEBER.COM-a verilən məlumata görə, görüş zamanı Eldar Abbasov qeyri-həyat sığortasının növlərindən olan və son zamanlar daha çox aktuallıq qazanmış avtomobil sığortasından danışmış, bu sığorta növünə dair videoroliklər nümayiş etdirmişdir. Daha sonra Əkbər Mədətli iştirakçılara əmlak sığortası, əmlak sığortası zamanı qiymətə təsir edən amillər, məsuliyyət sığortası barədə məlumat vermişdir.Azərbaycanda sığortanın qərb ölkələrinə nisbətən daha az inkişaf etməsinin səbəbini Eldar Abbasov belə açıqlamışdır: “Avropada sığorta şirkətlərinin yüksək səviyyədə inkişaf etməsinin səbəbi icbarı sığortanın burada 30-40 il əvvəl formalaşmasıdır. İcbari sığorta sığorta bazarını önə çəkən əsas amildir.” Orxan Bayramov dac ekspertin fikirlərinə əlavə olaraq bildirmişdir: “Avropada hər bir razı müştəri şirkətə üç müştəri gətirir, narazı müştəri isə on potensial müştəri aparır. Azərbaycanda isə narazı qalanlar daha çox müştəri aparırlar. Çünki sığorta şirkətlərinə inamsızlıq var.”Ekspertlər əhalidə sığortaya güvənlilik hissinin formalaşdırılması məqsədilə bu istiqamətdə maarifləndirmə işlərinin daha geniş aparılmasının zəruriliyini vurğulamış və “İRƏLİ” İctimai Birliyinin Azərbaycan Respublikası Maliyyə Nazirliyinin Dövlət Sığorta Nəzarəti Xidməti ilə bu istiqamətdə həyata keçirdiyi layihələri təqdirəlayiq hesab etdiklərini xüsusi qeyd etmişlər. Sonda qonaqlar layihə iştirakçılarına hədiyyələr təqdim etmişlər.Xatırladaq ki, 100 nəfər gəncin qatıldığı “Gənc Liderlər üçün Qış Universiteti−Sığortalı Gələcək” layihəsi Qəbələ rayonunda 15 Fevral 2012-ci il tarixinədək davam edəcək.Layihə çərçivəsində gənclərə sığorta, biznes, kommunikasiya, iqtisadiyyat, natiqlik, liderlik, idarəetmə, informasiya texnologiyalarından düzgün istifadə kimi praktiki mövzularda təlimlər keçiləcək. Layihə 5 gün müddətində bir sıra mühüm dövlət adamlarını, millət vəkillərini, iş adamlarını, müxtəlif mütəxəssisləri və həmçinin müxtəlif sahələrdə göstərdikləri uğurlu fəaliyyətlərə görə cəmiyyətdə tanınan və rəğbət qazanan şəxsiyyətləri qonaq edəcək.Qeyd edək ki, layihə Azərbaycan Respublikasının Gənclər və İdman Nazirliyi, Azərbaycan Respublikasının Maliyyə Nazirliyi və “İRƏLİ” İctimai Birliyi tərəfindən həyata keçirilir. AzTV, XəzərTV, həmçinin 1news.az, gun.az, AzerTAc, news.az, azxeber.com, qaynar.info, interfax.az agentlikləri layihənin rəsmi informasiya dəstəkçisidirlər.
