“İRƏLİ” İctimai Birliyi, Azərbaycan Respublikası Gənclər və İdman Nazirliyi və Azərbaycan Respublikası Maliyyə Nazirliyi tərəfindən Qəbələ rayonunda keçirilən “Gənc Liderlər üçün Qış Universiteti – Sığortalı Gələcək” layihəsinin növbəti qonağı GRBS® Beynəlxalq Tədris Mərkəzinin menecment üzrə aparıcı ekspertlərindən biri, eyni zamanda GRBS® Şirkətlər Qrupunun İdarəedici Partnyoru Bəhram Qurbanov olmuşdur. Qonaq tərəfindən gənc lidərlərə “Liderlik bacarıqları” mövzusunda master-klass keçirilmişdir.
Panel zamanı ekspert qeyd etmişdir: “Bizi gələcəkdə nə gözlədiyini və bizim üçün gələcəkdə hansı dəyərlərin bizdə qalmasını və ya yeni hansı dəyərlərə yiyələnmək istədiyimizi müəyyən etməklə biz öz vizyonumuzu qura bilərik. Əgər biz öz vizyonumuzu düzgün müəyyən edə bilməsək, onda bizim davamçılarımıza da öz düzgün vizyonlarını qurmağa yardımçı ola bilməyəcəyik. Lakin liderlik tək vizyonun qurulması ilə bitmir.”
Master-klass zamanı lider olmağa iddialı gənclər vizyonun qurulması ilə yanaşı, sistemli düşünmə, vaxtın idarə olunması, diqqəti cəlbetmə üsulları, etibarlılıq yaratmağın sirləri, təqdimata hazırlıq, natiqlik qabiliyyəti, dəyişikliyin əsas məqamları, təsir etmək üçün strategiyalar, menecer və lider arasındakı əsas fərqlər, münaqişələrin həlli yolları, strateji planlaşdırma kimi mövzularda da nəzəri və praktiki məlumatlar əldə etmişlər. Müxtəlif öyrədici-əyləncəli oyunlardan istifadə, maraqlı animasiyalar iştirakçıları daima impulsda saxlamış və master-klassın yüksək effekt yaratmasına imkan vermişdir.
Sonda hər bir iştirakçıya GRBS şirkətinin Dil Proqramları istiqaməti üzrə təklif edilən Ümumi və İşgüzar İngilis dili kurslarına, həmçinin TOEFL IBT, IELTS, GMAT, GRE, SAT və LSAT hazırlıq kurslarına 21 %-lik güzəşt kuponları təqdim edilmişdir.
Master-klass Azərbaycan Respublikasının Dövlət Himninin birgə ifası ilə sona çatmışdır. Tədbirdən sonra mövzu ilə bağlı iştirakçıların müxtəlif sualları Bəhram Qurbanov tərəfindən cavablandırılmışdır.
Xatırladaq kki, layihə Azərbaycan Respublikasının Gənclər və İdman Nazirliyi, Azərbaycan Respublikasının Maliyyə Nazirliyi və “İRƏLİ” İctimai Birliyi tərəfindən həyata keçirilir. AzTV, XəzərTV, həmçinin 1news.az, gun.az, AzerTAc, news.az, azxeber.com, qaynar.info, interfax.az agentlikləri layihənin rəsmi informasiya dəstəkçisidirlər
