Məlum olduğu kimi, 2010-cu ildə “Məişət zorakılığının qarşısının alınması haqqında”Azərbaycan Respublikasının qanunu qəbul edilib. Lakin hələ də cəmiyyətdə məişət zorakılığı hallarına rast gəlinir. Təəssüf ki, tanınmış insanlar məişət zorakılığı əleyhinə kampaniyalara, maarifləndirici tədbirlərə qoşulmaqdan, cəmiyyətə yaxşı nümunələr təqdim etməkdənsə əksinə hərəkət edirlər. Day.az-ın məlumatına görə, bu günlərdə müğənni Rəqsanə İsmayılova Space Tv-nin “Plus-Minus” verilişində verdiyi açıqlamada qızı Aysun ilə bağlı şayiələrə cavab olaraq bildirib ki, “Mən onun tərbiyəsinə ciddi yanaşıram. O, böyük olmasına baxmayaraq, hələ də onu döyürəm”.

Bu açıqlama açıq-aşkar məişət zorakılığının etiraf olunmasıdır və biz bunu pisləyirik. Məişət zorakılığını təbliğ edən bu cür çıxışların televiziya efirindən səslənməsi xüsusilə təhlükəli olmaqla kütləvi olaraq qanunun pozulmasına, qız uşaqlarının döyülməsinin tərbiyə vasitəsi kimi vacibliyi barədə yanlış təsəvvürün formalaşmasına və başqa mənfi hallara səbəb ola bilər. Hesab edirik ki, canlını, xüsusilə qız uşağını döymək vandalizmdir və heç bir halda tərbiyə vasitəsi hesab oluna bilməz. Biz vəzifəsindən, tutduğu mövqedən, ictimai çəkisindən asılı olmayaraq bu cür zorakılığa yol verən və fəxrlə etiraf edənləri şiddətlə qınayrıq. Heç bir cinayət cəzasız qalmamalıdır, həmçinin bu açıqlama cəmiyyətdə müzakirəyə çıxarılmalı, aidiyyatı qurumlar qanunla nəzərdə tutulmuş tədbirləri təcili həyata keçirməldiirlər. Döymək, işgəncə vermək qanunla qadağandır və biz Rəqsanə İsmayılovadan da “Məişət zorakılığının qarşısının alınması haqqında” Azərbaycan Respublikasının qanununa əməl etməsini, normal tərbiyə üsullarından istifadə etməsini, qızından mətbuat vasitəsilə üzr istəməsini tələb edirik.