İngiltərənin "Mançester Siti" klubunun baş məşqçisi Pep Qvardiola komandanın yeni transferi, özbəkistanlı müdafiəçi Abdukodir Xusanov haqqında fikirlərini bölüşüb.
AZXEBER.COM xarici mediaya istinadən xəbər verir ki, ispaniyalı mütəxəssis 20 yaşlı futbolçunun komandaya tez uyğunlaşdığını və onun artıq kollektivin sevimlisinə çevrildiyini bildirib.
"Xusanov artıq komanda daxilində çox sevilir. O, "Tottenhem"lə oyun üçün gələndə nə çanta, nə də başqa bir şey gətirmişdi. Sanki sadəcə meydana çıxıb oynamaq istəyirdi. Onunla danışanda isə daim gülümsəyir. İnanılmaz dərəcədə təvazökardır. Çox etibarlı oyunçudur, sürətlidir, ötürmə keyfiyyəti fantastikdir. Xətləri qıraraq oyunu açmaq bacarığı var".
Qvardiola eyni zamanda gənc müdafiəçinin hələ inkişaf etməli olduğunu vurğulayıb:
"O, cəmi 20 yaşındadır, çox gəncdir. Üzərində işləməli olduğu məqamlar var, amma onun bacarıqlarına malik oyunçular azdır. Hamı onu sevir, sakit təbiətlidir, çalışqan və şikayət etməyən biridir. Azarkeşlərimizin də onu sevəcəyinə əminəm".
Qeyd edək ki, Xusanov yanvar ayında 40 milyon avro qarşılığında Fransanın "Lans" klubundan "Mançester Siti"yə transfer olunub.
