Ötən gün Redaktorlar Birliyinin növbəti toplantısı olub. Tədbirdə “Yeni Müsavat”, “Azadlıq”, “Xural”, “Gündəm Xəbər”in baş redaktorları medianın real durumu ilə bağlı məruzə ilə çıxış ediblər. Qəbul edilən mühüm qərarlardan biri Redaktorlar Birliyinin gələn həftə təşkil edəcəyi iki dəyirmi masa ilə bağlı olub. Həftənin ikinci günü Zabitlər Evində keçiriləcək dəyirmi masada internet media, onun hazırkı vəziyyəti və s. məsələlər müzakirə olunacaq. Həftənin beşinci günü Media Mərkəzində təşkil olunacaq dəyirmi masada isə yayım problemləri əsas müzakirə mövzusu olacaq.
Toplantıda qəbul edilən mühüm qərarlardan biri isə “Xural” qəzetinin bölgə müxbiri Aydın Canıyevin müdafiəsi ilə bağlı tədbirlərin keçirilməsi olub. Toplantıda çıxış edən “Yeni Müsavat” qəzetinin baş redaktoru Rauf Arifoğlu bildirib ki, onlara qarşı Müdafiə Nazirliyindən beş iddia ərizəsinin daxil olacağı gözlənilir. Baş redaktor deyib ki, nazirlik məhkəmə yolu ilə redaksiyadan daha yüksək məbləğdə pul tələb etməyi planlaşdırır. R.Arifoğlu belə bir iddianın qaldırılacağı təqdirdə Müdafiə Nazirliyinin qarşısında aksiya keçirəcəklərini elan edib. Toplantıda, eyni zamanda “Xural”a qarşı irəli sürülən 150 min manatlıq yeni məhkəmə iddialarının da diqqətdə saxlanılacağı vurğulanıb.
