Onun idarəyə çağırılmasına səbəb bir il əvvəl Təhmasib Novruzovla debat zamanı yaranmış insidentdir.
Keçmiş müdafiə naziri Rəhim Qazıyev Səbail Rayon Polis İdarəsinə çağırılıb. O, aprelin 9-u saat 10:30-da İdarədə olmalıdır. Çağırış vərəqəsini idarənin baş müstəntiqi, mayor Ziya Əliyev imzalayıb. Qazıyevin idarəyə çağırılmasına səbəb bir il əvvəl Təhmasib Novruzovla debat zamanı yaranmış insidentdir. Novruzov keçmiş müdafiə nazirinin həmin debatda onun şərəf və ləyaqətini alçaltdığına dair polisə şikayət edib. R. Qazıyev "Azadlıq" əməkdaşı ilə söhbəti zamanı bildirib ki, Novruzovun bir il əvvəl baş vermiş olaya görə indi şikayət etməsi başqa mətləbdən xəbər verir. “Bir il əvvəl baş vermiş hadisə indi “yada düşübsə”, deməli gerçək səbəb bu deyil. Polis idarəsinə çağırılmağımın əsl səbəbi ölkə başçısına yazdığım açıq məktubdur. Sadəcə, gerçək səbəbi bu yolla pərdələyirlər”, - deyə Qazıyev bildirib.
