Rusiya prezidentinin köməkçisi Nikolay Patruşev Polşa xarici işlər naziri Radoslav Sikorskinin Rusiyanın hərbi yolla məğlub edilə biləcəyi barədə açıqlamalarına cavab verib.
Patruşev bildirib ki, Polşa Rusiya ilə hərbi qarşıdurmaya gedəcəyi təqdirdə Moskva bütün qüvvə və vasitələrindən istifadə edərək iki-üç gün ərzində Polşanı məhv edə bilər.
Politoloq Rusif Məmmədsoy AZXEBER.COM-a açıqlamasında deyib ki, Rusiya tərəfindən belə sözlər tez-tez işlədilir:
"Son dövrlər Rusiya-Ukrayna müharibəsinin gedişində Rusiya siyasi elitası arasında müəyyən çarpışmalar mövcuddur. Belə açıqlamalar daha çox Təhlükəsizlik Şurası sədrinin müavini Dmitri Medvedyev tərəfindən verilir. Bu açıqlamaların pərdəarxasında bir məntiq yatır. Rəsmi Kreml diqqətə çatdırmaq istəyir ki, biz Avropa ölkələrinə də hücum edə bilərik”.
O qeyd edib ki, belə hücumlar bir növ nəbz yoxlaması kimi dəyərləndirilir:
"Əslində, bir çox kəşfiyyat məlumatlarına əsasən, bu dövrlər ərzində bəzi iddialar ortaya çıxmışdı ki, Rusiya Baltikyanı ölkələrə və yaxud NATO ölkəsinə kiçikhəcmli hücumlar təşkil etmək niyyətindədir. Burada məqsəd NATO-nun 5-ci maddəsinin işə düşüb-düşməyəcəyini test etməkdir. Bu hücumlar bir növ nəbz yoxlaması kimi dəyərləndirilir”.
"Rusiya Polşa ilə bağlı belə bir addıma getməyəcək. Çünki Polşa Avropanın aparıcı dövlətlərindən biridir; həm iqtisadi, həm də hərbi gücü kifayət qədərdir. Rusiya növbəti cəbhə açmaq niyyətində deyil. Sadəcə, bu açıqlama nəbz yoxlamasıdır”,-deyə politoloq qeyd edib.
Şahanə Ziyad
