Rusiyada ali təhsil alan azərbaycanlı tələbələrin valideynləri narahatdır.
Onlar övladlarının Azərbaycan ali təhsil müəssisələrinə köçürülməsi üçün sadələşdirilmiş, şəffaf və əlçatan mexanizmin yaradılması xahiş edir.
Valideynlər bildirir ki, son illər Rusiyada təhsil almağın maliyyə yükünün artması, miqrasiya qaydalarının sərtləşməsi və geosiyasi vəziyyətin yaratdığı narahatlıqlar övladlarını Vətənə qaytarmaq istəyini daha da gücləndirib. Onlar hesab edirlər ki, Azərbaycan və Rusiya ali təhsil sistemləri arasında mövcud olan kredit tanınması imkanları bu prosesi reallaşdırmağa şərait yaradır. Müraciətdə həmçinin köçürülmə prosesini həyata keçirəcək xüsusi qəbul komissiyalarının yaradılması, qaydalar və tələb olunan sənədlərlə bağlı ictimaiyyətə vaxtında rəsmi məlumat verilməsi, eləcə də xaricdə təhsilə yönələn vəsaitin ölkənin təhsil sisteminin və iqtisadiyyatının inkişafına xidmət etməsinin vacibliyi vurğulanıb.
Milli Məclisin deputatı Ceyhun Məmmədov AZXEBER.COM-a bildirib ki, burada məsələyə qanunvericilik prizmasından baxılmalıdır:
"Bu məsələ Azərbaycan qanunvericiliyi ilə tənzimlənir. Yəni, burada məsələyə qanunvericilik prizmasından baxılmalıdır və qanunvericiliyin bu barədə nə dediyi əsas götürülməlidir. Diplomların tanınması və ya tələbələrin başqa ölkədən köçürülməsi üçün əsas şərtlərdən biri həmin tələbələrin Dövlət İmtahan Mərkəzinin vasitəsilə imtahan verməsi və yalnız bundan sonra xarici ali təhsil müəssisəsinə qəbul olunmasıdır. Yəni, tələbələr Dövlət İmtahan Mərkəzinin təşkil etdiyi imtahanlarda iştirak etmədən, yalnız attestat əsasında qəbul olublarsa, burada artıq mövcud norma və qaydaların pozulmasından söhbət gedir.
Bu baxımdan biz bütün xaricdə təhsil almaq istəyən gənclərə tövsiyə edirik ki, məsələyə mütləq bu cür yanaşsınlar. Onlar mütləq şəkildə Dövlət İmtahan Mərkəzinin keçirdiyi imtahanda iştirak etməli, müəyyən bal toplamalı və yalnız bundan sonra xaricdə təhsil almalıdırlar. Belə olduqda, sistemdə onların Azərbaycanda imtahan verdikləri öz əksini tapır”.
Deputat qeyd edib ki, dövlətimiz çox humanistdir:
"Dövlətimiz çox humanistdir. Rusiyada müharibə şəraitinin mövcud olduğu, insanlarımızın vəziyyətinin daha da mürəkkəbləşə biləcəyi nəzərə alınaraq, həmin tələbələrin ölkəmizə köçürülməsi məsələsinə baxıla bilər. Ancaq bu zaman müəyyən norma və qaydalara riayət olunması şərti ilə bu məsələnin həlli mümkündür”.
Şahanə Ziyad
