Rusiya hökumətinin Azərbaycan Respublikası və Rusiya Federasiyası arasında Azərbaycan neftinin Rusiya Federasiyası ərazisindən nəql olunmasına dair 18 yanvar 1996-cı ildə imzalanmış müqaviləni ləğv etməsi Azərbaycanda birmənalı qarşılanmayıb.

Bəzi siyasi şərhçilər məsələnin arxasında Kremllə Bakı arasında olan siyasi gərginliyin nəticəsi kimi qiymətləndirsələr də, dövlət rəsmiləri müqavilənin ləğvinin iqtisadi məsələlərlə əlaqələndiriblər.

AZXEBER.COM portalı olaraq məsələylə bağlı politoloq Qabil Hüseynlinin də fikirlərini öyrəndik. Q.Hüseynlinin fikrincə, Bakı-Novorossiyk neft kəmərinin fəaliyyətinin dayandırılmasında iqtisadi tərəflər olsa da, əsas məsələ siyasi məqsədlərin üzərinə düşür.

“Rusiya yumurtadan yun qırxmağa çalışır. Rusiya istəyir ki, enerji vasitəsi ilə siyasi təzyiqlər eləsin. Azərbaycan isə siyasətsiz enerji satışı həyata keçirmək istəyir. Biz heç bir ölkənin daxili işlərinə qarışmadan öz siyasətimizi yürüdür və iqtisadi anlaşmalarda heç bir siyasi şərtlər irəli sürmürük.

Bu iqtisadi məsələ deyil, bu iqtisadi-siyasi məsələdir. İqtisadi tərəfi ondan ibarətdir ki, Rusiya kəmərin bütünlüklə dolmasını, nasoslar hesabına neftin idxalını 2-3 dəfə artırmaq istəyir. Odur ki, nə qədər iqtisadi tərəfi olsa da, əsas məsələ siyasi tərəfdir”.

Politoloqun fikrincə, hazırda Azərbaycanda enerji bazarındakı qiymətlər digər ölkələrlə müqayisədə daha əlverişlidir:

“Azərbaycan müstəqil enerji siyasəti yürüdür. Buna görə də, Azərbaycan tərəfinin heç bir təqsiri yoxdur. Bu kimlərinsə xoşuna gəlməyə bilər amma, Azərbaycanın müstəqil siyasəti artıq bütün dünya tərəfindən qəbul edilir. Avropa ölkələri, İsrail yaxın gələcəkdə Azərbaycan neftindən, qazından istifadə edəcəkdir. Bu o deməkdir ki, Azərbaycanın iqtisadiyyatında yeni bir ciddi enerji rəqibi meydana çıxıbdır və müəyyən sahələrdə Rusiyanı sıxışdırmağa başlayıbdır. Rusiyanı qıcıqlandıran məqamlardan biri də məhz budur”.

Fatimə İbrahimova