Rusiya bazarında yanacaq çatışmazlığı var. Bunu Rusiya Baş nazirinin müavini Aleksandr Novak bildirib. Onun sözlərinə görə, dron uçuşları səbəbindən neft emalı zavodları qismən sıradan çıxdığı üçün bazarda yanacaq çatışmazlığı mövcuddur.
Novak hakimiyyət orqanlarının neft emalı zavodlarının qorunmasını gücləndirmək üçün əlindən gələni etdiyini söyləyib. O deyib ki, hökumət neft emalı zavodlarının gücünün istifadəsini və kifayət qədər istehsalı təmin etmək üçün əlindən gələni edir. Rusiyanın kifayət qədər yanacaq emalı gücü var. Hakimiyyət regionlara əlavə yanacaq idxalını təmin etmək niyyətindədir. Rusiyadan benzin və dizel ixracına qoyulan qadağa yanacaq vəziyyətini sabitləşdirmək və daxili bazara tədarükü təmin etmək üçün lazımdır.
Bəzi satıcılar əlavə pul qazanmaq və qiymətləri qaldırmaq üçün Rusiya yanacaq bazarındakı vəziyyətdən istifadə edirlər. Federal Antiinhisar Xidməti yanacaq qiymətlərini yaxından izləməlidir.
İqtisadçı Elşən Bağırzadə AZXEBER.COM-a açıqlamasında deyib ki, Rusiyada yaranmış problem neft qıtlığı deyil, yanacaq istehsalı və təchizatında yaranan çatışmazlıqdır:
"Rusiyada yaranmış problem neft qıtlığı deyil, yanacaq istehsalı və təchizatında yaranan çatışmazlıqdır. Son dövrlərdə neft emalı zavodlarının fəaliyyətinin pozulması daxili bazarda benzin və dizel təklifini azaldıb. Buna görə də Rusiya hökuməti ilk növbədə daxili bazarın təminatına üstünlük verir və bəzi yanacaq növlərinin ixracını məhdudlaşdırır”.
O qeyd edib ki, qısamüddətli perspektivdə Rusiya bu problemi əsasən üç istiqamətdə həll etməyə çalışacaq:
"Qısamüddətli perspektivdə Rusiya bu problemi əsasən üç istiqamətdə həll etməyə çalışacaq: emal zavodlarının fəaliyyətini bərpa etmək, daxili bazara daha çox yanacaq yönəltmək və zərurət yaranacağı halda hazır neft məhsullarının idxalını artırmaq.
Hazırda Rusiyanın yanacaq idxalı üçün ən real mənbə Hindistan hesab olunur və bu istiqamətdə artıq tədarüklər barədə məlumatlar mövcuddur. Bundan başqa, Çin və Qazaxıstan da potensial təchizatçılar sırasındadır. Bununla belə, Rusiyanın uzunmüddətli dövrdə idxaldan asılı qalacağı gözlənilmir. Ölkə kifayət qədər xam neft ehtiyatına malikdir və əsas məqsəd emal güclərini tam bərpa edərək daxili tələbatı yenidən öz hesabına təmin etməkdir”.
Şahanə Ziyad
