Rusiya ilə Belarus arasında vəziyyət yenidən gərginləşə bilər. “İnterfaks”ın məlumatına görə, Belarus prezidenti Aleksandr Lukaşenko rusiyalı jurnalistlərin ölkədən çıxarılması haqda göstəriş verib. Dövlət başçısı tələbini istehlak bazarı və valyuta sisteminin vəziyyəti haqda keçirdiyi iclasda səsləndirib.
“Ən çox Rusiya kütləvi informasiya vasitələrində isteriya müşahidə etmək mümkündür... Reytinqlərinin qalxmaması üçün onların adlarını çəkməyəcəm. Amma əlinizdən gələni edin ki, bir də həmin KİV-lər bizim ərazimizdə dolaşmasın. Bunu ona görə etmirik ki, onların ağızlarını bağlayaq. Mən görmüşəm ki, bütün ajiotaj onlar tərəfdən gəlir”,- deyə Belarus prezidenti bildirib.
İş ondadır ki, Belarus milli pul vahidi - rublun devalvasiyasının gətirib çıxara biləcəyi nəticələr haqda Rusiya KİV-in yazdığı məqalələr Aleksandr Lukaşenkonu əməlli-başlı özündən çıxarıb: “Sonra da bizi Rusiyanı şantaj etməkdə günahlandırırlar”.
Lukaşenkonun sözlərinə görə, Rusiya KİV-i Belarus baş naziri Mixail Myasnikoviç və milli bankın rəhbəri Petr Prokopoviçin heç bir iş görməməsi haqda yazılar yazırlar. Rusiya kütləvi informasiya vasitələri Lukaşenkonun Qazaxıstana qaçdığını da yazıblarmış. Bir müddət öncə “Kommersant” qəzeti yazmışdı ki, Belarusda dövlət KİV-lərinə ölkədə iqtisadi böhran olması haqda xəbər verməsi qadağan olunub.
//Ans Press
