İyulun 19-da Kiyevə endirilən raket zərbəsi nəticəsində Ukraynanın UKRTAC şirkətinin zavodu və anbarları tamamilə məhv edilib.
AZXEBER.COM xəbər verir ki, bu barədə şirkətin inkişaf üzrə direktoru Severion Danqadze "Facebook” səhifəsində bildirib.
Severion Danqadze raket zərbəsi nəticəsində müəssisənin əməkdaşları arasında ölən və xəsarət alan olmadığını nəzərə çatdırıb: "Bu gecə müəssisəmiz tarixinin ən böyük faciəsini yaşadı. Birbaşa raket zərbəsi nəticəsində UKRTAC zavodu və anbarlarımız tamamilə məhv edildi. Binaları itirmək olar. Avadanlıqları itirmək olar. Əmlakı itirmək olar. Amma komandanı, onun təcrübəsini, biliklərini, xarakterini və inamını məhv etmək mümkün deyil”.
Severion Danqadze vurğulayıb ki, şirkəti qarşıda çətin dövr gözləyir, lakin komanda fəaliyyəti bərpa etməyi və istehsalı yenidən qurmağı planlaşdırır.
Qeyd edək ki, UKRTAC 2022-ci ildə yaradılıb, zirehli müdafiə vasitələri və taktiki avadanlıqların tanınmış təchizatçılarından biridir. Məhsul çeşidinə zirehli jiletlər, zireh lövhələri, ballistik paketlər, dəbilqələr, taktiki geyimlər, tibbi avadanlıqlar və digər xüsusi təyinatlı vasitələr daxildir.
