Xatırladaq ki, dekabrın 15-də Moskvada millətçi ruslar kütləvi nümayiş keçirməyə cəhd ediblər. Moskva milisi səhər saatlarından paytaxtın mərkəzində nəzarəti gücləndirsə də, iğtişaşlarının qarşısını almaq mümkün olmayıb. Axşam saatlarından Kiyev vağzalı ətrafına toplaşan və armaturlarla silahlanan gənclər milisin və daxili qoşun hissələrinin yaratdığı mühafizə zəncirini qismən yara bilib. Nəticədə 5 nəfər xəsarət alıb. Milis 300 nəfəri saxlayıb.
Rusiya Daxili İşlər Nazirliyinin rəsmisi Viktor Biryukovun sözlərinə görə, saxlanılanların hamısı ayrı-ayrı diasporaların və radikal qrupların üzvləridir. O, kiçik toqquşmaların baş verdiyini desə də, genişmiqyaslı qarşıdurmanın baş vermədiyini və milisin vəziyyəti nəzarətdə saxladığını bildirib.
