Şirvan şəhəri istiqamətində hərəkət edən “Mercedes” markalı avtomobil əks istiqamətdən gələn “VAZ 2107” ilə toqquşub. Qəza nəticəsində ”Jiquli” tamamilə yararsız vəziyyətə düşüb. 4 nəfər isə aldıqları xəsarətlərlə Şirvan şəhər mərkəzi xəstəxanasına yerləşdiriliblər.
Xəstəxananın travmatologiya şöbəsinin müdiri Tofiq Hüseynovun sözlərinə görə, yaralılar arasında ”Jiquli”nin sürücüsü Sabirabad rayon Suqovuşan kənd sakini, 1974-cü il təvəllüdlü Əmənov Rövşən Maşallah oğlunun vəziyyəti ağır olduğundan reanimasiya şöbəsinə çatdırılıb. “Mercedes”in sərnişinləri 21 yaşlı Günel Allahverdiyeva və 24 yaşlı Sima Allahverdiyeva travmatologiya, 45 yaşlı Məmmədova Sevda Məcid qızı isə reanimasiya şöbəsinə yerləşdirilib.
Həkimlər sonuncunun vəziyyətinin orta ağır olduğunu bildirirlər. Hadisənin başvermə səbəbinə gəlincə, şahidlərin sözlərinə görə “VAZ 2107” qarşısındakı 3 avtomobili ötüb keçmək istəyərkən “Mercedes”in yoluna çıxıb.
Hazırda hadisə ilə bağlı polis tərəfindən araşdırmalara başlanılıb.
/// SİA
