ABŞ-ın nüfuzlu beyin mərkəzi olan Strateji və Beynəlxalq Araşdırmalar Mərkəzində (CSIS) "İran-Azərbaycan münasibətləri və Qafqazda strateji rəqabət” mövzusunda konfrans keçirilmişdir. Konfransı giriş nitqi ilə Endryü Kuçins (CSIC) və Fərhad Məmmədov (SAM) açmışlar.

"İran-Azərbaycan Münasibətlərinin Cari Dinamikası” mövzusuna həsr edilmiş birinci sessiyada SAM-ın direktoru Fərhad Məmmədov, millət vəkili Asim Mollazadə, Xarici siyasət məsələlərinin təhlili şöbəsi aparıcı elmi işçisi Heydər Mirzə, Yaxın Şərq İnstitutunun elmi işçisi Aleks Vatanka və "İran-Azərbaycan Əlaqələri: Regional və Beynəlxalq Təsirlər” mövzusuna həsr edilmiş ikinci sessiyada isə qonaq elmi işçi Lu Ksianq və "Turkish Policy Quarterly” jurnalının baş redaktoru Nigar Göksel mühazirələrlə çıxış etmişlər.

Brukinqs İnstitutunda "Cənub enerji dəhlizi: geostrateji oyun qaydalarını dəyişir?” mövzusuna həsr edilmiş konfransını giriş nitqi ilə TUSIAD-ın baş elmi işçisi Kemal Kirisci və SAM-ın direktor müavini Gülşən Paşayeva açmışlar. "TANAP və onun Avropada rolu” mövzusuna həsr edilmiş birinci sessiyada XİN mətbuat xidmətinin rəhbəri Elman Abdullayev "Avropa enerji təhlükəsizliyinə Azərbaycanın töhfəsi”, İqtisadiyyatın təhlili və qloballaşma məsələləri şöbəsi aparıcı elmi işçisi Gülmira Rzayeva "TANAP-ın texniki, kommersiya və geosiyasi reallıqları”, Brukinqs İnstitutu, Enerji Təhlükəsizliyi Direktoru Çarli Ebinger "Avropa enerji təhlükəsizliyi landşaftının dəyişməsi və onun Cənub Dəhlizi üçün nəticələri” və "Cənub Dəhlizinin Cənubi Qafqaz və Xəzər regionunda təhlükəsizlik və inkişafı sürətləndirmək üçün imkanları” mövzusuna həsr edilmiş ikinci sessiyada Corc Town Universitetinin qonaq elmi işçisi Brenda Şaffer, Atlantik Şuranın qonaq baş elmi işçisi Adnan Vatansever və Xarici siyasət məsələlərinin təhlili şöbəsinin müdiri Rövşən İbrahimov "Dənizə çıxışı təmin edənlərin enerji siyasəti” mövzularında çıxışlar etmişlər.

Bundan əlavə İqtisadiyyatın Təhlili və Qloballaşma Məsələləri Şöbəsinin müdiri Vüsal Qasımlı ABŞ-ın beyin mərkəzi Peterson İnstitutunda (Peterson Institute for International Economics) görüş keçirmişdir. Görüşdə Vüsal Qasımlının Almaniyada nəşr olunan "Resursla zəngin ölkələr: Modernizasiya və diversifikasiya" kitabı da təqdim edilmişdir. V.Qasımlı Azərbaycan iqtisadiyyatında karbohidrogen gəlirlərindən istifadə sahəsində əldə edilən uğurlar, iqtisadiyyatın diversifikasiyası və modernləşdirilməsi sahəsində aparılan siyasət barədə məlumat verib. Görüşdə Peterson İnstitutunun baş elmi işçi Anders Åslund transformasiya dövrünü yaşayan ölkələrin təcrübəsini geniş təhlil edib. Peterson İnstititu və SAM arasında elmi əməkdaşlıq perspektivləri də müzakirə olunmuşdur.

Daha bir görüş Atlantik Şurada (Atlantic Council) keçirilmişdir. Görüşdə SAM-ın direktoru Fərhad Məmmədov, direktor müavini Gülşən Paşayeva, Xarici siyasət məsələlərinin təhlili şöbəsinin müdiri Rövşən İbrahimov, Xarici siyasət məsələlərinin təhlili şöbəsinin aparıcı elmi işçisi Kamal Makili-Əliyev, Xarici siyasət məsələlərinin təhlili şöbəsinin aparıcı elmi işçisi Zaur Şiriyev, İqtisadiyyatın təhlili və qloballaşma məsələləri şöbəsi aparıcı elmi işçisi Gülmira Rzayeva, Daxili siyasətin təhlili şöbəsinin baş elmi işçisi Rauf Qaragözov iştirak etmişlər. Görüş əsnasında ABŞ – Azərbaycan münasibətləri, regionda cərəyan edən hadisələrlə bağlı fikir mübadiləsi aparılmışdır.

Xatırladaq ki, 29 aprel – 8 may tarixlərində 15 nəfərdən ibarət Azərbaycan Respublikasının Prezidenti yanında Strateji Araşdırmalar Mərkəzinin nümayəndə heyəti ABŞ-da rəsmi səfərdə olacaq.

Səfər zamanı ABŞ-ın 7 şəhərində nüfuzlu beyin mərkəzləri və universitetlərdə 20 konfrans, görüş və mühazirə nəzərdə tutulmuşdur.