Azərbaycan Respublikasının Qeyri Hökumət Təşkilatlarına Dövlət Dəstəyi Agentliyinin dəstəyi ilə "İnnovativ Media” Jurnalistlərin Peşəkarlığının Artırılmasına Dəstək İctimai Birliyi "KİV-də və sosial şəbəkələrdə "saxta xəbərlər”in (fake news) qarşısının alınması istiqamətində təşəbbüslər" layihəsi çərçivəsində təlimlərə başlayıb.
AZXEBER.COM xəbər verir ki, layihə rəhbəri Xatirə Hüseynova və ekspert Aynur Nəsirova gənc jurnalistlərlə görüşdə KİV və sosial şəbəkələrdə saxta xəbərlərə qarşı mübarizə tədbirlərini artırmaq və bu tip xəbərlərə qarşı mübarizə aparmağın yollarından danışıblar.
Maarifləndirici təlimdə feyk-nyus nədir, törətdiyi fəsadlar hansılardır? suallarına cavablar əyani vəsaitlərlə verilib. Gənc jurnalistlər 44 günlük Vətən Müharibəsi ərəfəsində və sonrakı dövrdə ölkəmizlə bağlı yayılan saxta xəbərlər və onlarla mübarizə barəsində disskusiyalara cəlb ediliblər.
Təlimçilər təlim iştirakçılarını istər mediada, istərsə də sosial şəbəkələrdə yayılan feyk-nyuslara qarşı diqqətli olmağa, media savadlı olmağa çağırıblar. Daha sonra isə saxta xəbərlər və mediamanipulyasiya halları nümunələrlə, faktlarla izah edilib.
Foto-materialların yanıldıcı olmasının insanların yalan düşüncələrə qapılmasına, qərəzli düşüncələrə gətirib çıxarmasına səbəb olması bildirilib. "Bunların qarşısının alınması gələcək jurnalistlərin - sizlərin əlindədir"deyən Xatirə Hüseynova gənc jurnalistləri bir daha diqqətli olmağa, bu hallardan yayınmağa çağırıb.
