- Səbinə, necə oldu ki, musiqini seçdiniz?

- Allah mənə doğuluşdan oxumağı sevən ürək verib. Elə uşaqlıqdan da oxumuşam. əvvəl uşaq xoruna gedirdim, sonra məktəbi bitirdim, musiqi məktəbinin vokal sinfinə daxil oldum. Bundan sonra mahnılar, müsabiqələr, festivallar başladı. Hər şey öz-özünə alındı…

- Neçənci dəfədir ki, “Eurovision”da iştirak edirsiniz?

- Artıq dördüncü dəfədir.

- Sizdə bu canatım, inadkarlıq hardandır? Xarakterdən gəlir?..

- Bəli. İstədiyimə nail olmağı sevirəm (gülür). Amma bu, çox səviyyəli, populyar, baxımlı müsabiqədir. Şəxsən mənim üçün, bir müğənni kimi, bu maraqlıdır. Bir vətənpərvər kimi, əlbəttə istərdim ki, vətənimi layiqincə təmsil edim. Və müğənni olaraq anlayıram ki, bu müsabiqə – yaxşı sənət təcrübəsidir.

- Bir ifaçı kimi sizin üçün “Eurovision”da çıxış etmək nə deməkdir? Axı Azərbaycanın bu müsabiqədə qələbəsindən sonra bu müsabiqədə ölkəmizi təmsil etmək böyük məsuliyyətdir.

- Əksinə, mən sübut etmək istəyirəm ki, Azərbaycan təsadüfən qələbə çalmayıb. Biz layiqli yerləri qazana bilərik.

- Yəni ikinci dəfə birinci yeri qazanmaq çətin olmayacaq?

- (gülümsəyir) Biz çalışacağıq.

- Səbinə, çoxdan caz ifa edirsiniz?

- Mən əsl ənənəvi cazı ifa etmirəm. Bir neçə caz istiqamətində – soul, blüz, ballada, bossa-nova oxuyuram.

- Başqa hansı janrlara üstünlük verirsiniz?

- Azərbaycan muqisilərini sevirəm – həm klassik, həm də xalq mahnılarını.

- Muğama münasibətiniz necədir?

- Əla! Nə zamansa muğam ifa etməyi arzu edirəm. Muğamı çox sevirəm, bir müddət dərs almışam və mütləq onları davam etdirəcəyəm.

- Mahnılarımıza muğam elementləri daxil etmək dəbə çevrilib, Sizə belə bir mahnı versələr…

- Əla olar. Mən yalnız sevinərəm.

- Sizcə, bu il Azərbaycan mahnısı necə olmalıdır. Hüsniyyə deyirdi ki, o daha çox aqressiv olmalıdır, siz necə düşünürsünüz?

- Prinsipcə, razıyam. O, yaxşı mənada aqressiv və parlaq, çox dinamik olmalı, yalnız yüksək müsbət hisslər aşılamalıdır.

- Bəs duet oxumalı olsanız?..

- Mən öz qüvvəmə əminəm, bunu tək də edə bilərəm, mənim yaşım da, təcrübəm də buna imkan verir. Amma bu cür qərar verilsə, mən münsiflərin obyektivliyinə şübhə etməyəcəyəm. çünki ildən-ilə biz daha yaxşı nəticələr göstəririk – bura həm solo, həm də duetlər daxildir.

- Amma bununla belə, duetlər daha yaxşı təsir bağışlayır, elə deyil?

- Bu, fərdi məsələdir. İnsanlar fərqlidirlər, talelər müxtəlifdir (gülür).

- Ailəniz Sizin müğənni olmağınıza və bu müsabiqədə iştirakınıza necə baxır?

- Onlar məni dəstəkləyirlər. Buna görə sağ olsunlar.