112 Saylı Qax Seçki Dairəsi Azərbaycan üzrə ən aktiv və gərgin seçki təbliğatının getdiyi dairələrdən sayılır.
1 Noyabr seçkiləri təkcə Azərbaycanda deyil, ATƏT, AŞPA və Avropa Parlamenti kimi digər beynəlxalq qurumlarda da diqqətdə saxlanılır. Baş verən hər bir qanun pozuntusuna ölkə rəhbərliyi səviyyəsində kəskin reaksiya verilir və lazımi ölçü götürülür. Ötən seçkilərdə məktəb müəllimlərinin seçki prosesində iştirakı və qanunsuz müdaxilələr barədə mütəmadi xəbərlər dərc olunmuşdu və nəticədə həmin dairələrin nəticələri ləğv edilmiş və günahkarlar cəzalandırılmışdı.
Sosial şəbəkələrdə yayılan bəzi video görüntülər də ona sübutdur ki, bu faktlardan nəticə çıxarmayanlar var. Belə ki, Qax rayonu Ləkit kənd orta məktəbinin Tarix müəllimi Vaqif Aydınova qarşı olunan təhdidlər, onun iradəsinə zidd ifadələr verməyə məcbur edilməsi Azərbaycan müəllimi adının şərəf və ləyaqətinin alçaldılmasından başqa bir şey deyil.
Oktyabrın 17-də Ləkit kəndində yerli sakinlərlə görüşən deputatlığa namizəd Əhməd Şahidov kəndin qayğılarından danışıb. Görüşdə çıxış edən kənd məktəbinin müəllimi Vaqif Aydınov kənddə üzləşdiyi problemlərdən danışıb, yerli məmurların təzyiqlərini sadalayıb və Əhməd Şahidova dəstəyini ifadə edib.
Bundan 1 gün sonra - oktyabrın 18-də sosial şəbəkələrdə yayılan video isə həqiqətən də bütün dəyərlərin tapdanması və müəllim adının ayaqlar altına salınması idi. Belə ki, həmin dairədən deputatlığa namizədliyi ləğv olunmuş Paşa Məmmədov hər kəsi şoka salan video yayıb. Videoda görünür ki, Vaqif Aydınov dediyi sözü danaraq, deputat Azər Kərimliyə dəstək olduğunu açıqlayıb.
Qax sakinləri videoya şərh yazaraq bildiriblər ki, bu hərəkət də heç də səbəbsiz deyil. Belə ki, Vaqif Aydınovun birinci çıxışından sonra onun evinə gələn və özünü deputat Azər Kərimlinin səlahiyyətli nümayəndəsi kimi təqdim edən Kamal Muxtarlı adlı şəxs Vaqif müəllimi küçə söyüşləri ilə təhqir və təhdid edib. Sonda isə müəllimə pul verərək, onu ələ alıb.
Ailə üzvlərinin gözü qarşısında baş verən bu hadisədən bərk qorxuya düşən Vaqif Aydınov kamera qarşısında təkzib verməyə məcbur edilib.
Ləkit kənd məktəbinin Tarix müəllimi olan Vaqif Aydınovun hər iki çıxışını sizlərə təqdim edirik.
AZXEBER.COM olaraq Qaxın deputatı Azər Kərimli ilə əlaqə saxlamağa çalışsaq da, o telefonlara cavab vermədi. Qarşı tərəfin də fikrini yayımlamağa hazırıq.
