Xəbər verdiyimiz kimi, Milli Məclisin (MM) deputatları Rövşən Rzayev, Fərəc Quliyev və Azay Quliyev Ermənistana yola düşüb. Deputatlar Avronest Parlament Assambleyasının Sosial komitəsinin İrəvanda keçiriləcək iclasında iştirak edəcəklər. Komitənin toplantısında tərəfdaş dövlətlərdə vətəndaş cəmiyyətinin inkişafı, yoxsulluğun azaldılması strategiyası, parlamentlərdə və vətəndaş cəmiyyətində qadınların, gənclərin rolunun artırılması və digər məsələlərin müzakirəsi nəzərdə tutulur. Səfər fevralın 23-də başa çatacaq.
Qarabağ Azadlıq Təşkilatı (QAT) bir qrup azərbaycanlı deputatın Ermənistan paytaxtına səfər etməsi ilə bağlı bəyanat verib. QAT mətbuat xidmətindən verilən məlumata görə, bəyanatda Milli Məclisin deputatları Rövşən Rzayev, Azay Quliyev və Fərəc Quliyevin İrəvana səfəri pislənilib: “Bu cür səfərlərə heç bir adla - istər AVRONEST Parlament Assambleyası, istərsə də başqa bir tədbir olsun - bəraət yoxdur. Bu, erməni siyasətidir və işğal faktını unutdurmağa çalışırlar. Bu səfərlərə gedənlər bilməlidirlər ki, birmənalı şəkildə erməni siyasətinə xidmət edirlər. Bunu milli maraqlara xəyanət hesab edirik. Şəhidlərimizin ruhları onları heç vaxt bağışlamayacaq”.
