Prezidentin tapşıqığına uyğun olaraq qanun layihəsi hazırlanıb Dövlət Torpaq və Xəritəçəkmə Komitəsinin (DTXK) sədri Qərib Məmmədov bu gün Milli Məclisdə jurnalistlərə açıqlamasında bildirib ki,Prezident İlham Əliyevin 2011-ci ilin əvvəlində verdiyi göstərişə uyğun olaraq sənədsiz evlərin sənədləşdirilməsi barədə qanun layihəsi hazırlanıb. Komitə sədrinin sözlərinə görə, qanun layihəsi Milli Məclisdə təsdiqlənəndən sonra qüvvəyə minəcək. Q.Məmmədov qanun layihəsinin artıq müvafiq qurumlara təqdim olunduğunu söyləyib. Ölkə ərazisində, o cümlədən paytaxtda çoxlu icazəsiz tikililər var ki, onların əksəriyyəti vətəndaşların yaşadığı fərdi evlərdir. Hələ 2008-ci ilin sonlarında heç bir qanuni sənədi olmayan belə evlərin siyahılaşdırılmasına başlanılmışdı. Amma yarımçıq qaldı. Nəhayət bu ilin əvvəlindəPrezident İlham Əliyevin keçirdiyi iclasda məsələ yenidən gündəmə gətirildi. Ölkə başçısının Bakı şəhərindəki sənədsiz evlərin sənədləşdirilməsi ilə bağlı tapşırığına uyğun olaraq müvafiq tədbirlərə yenidən start verildi. Prezidentin göstərişinə əsasən, Bakı Şəhər İcra Hakimiyyəti sənədsiz evlərin məsələsiylə bağlı mexanizm hazırlamalı və layihə razılaşdırılmaq üçün Fövqəladə Hallar, Ədliyyə nazirlikləri, Əmlak Məsələləri Dövlət Komitəsi, Şəhərsalma və Arxitektura Komitəsi, Dövlət Torpaq və Xəritəçəkmə Komitəsinə təqdim olunmalıdır. Bundan sonra yekun variant qəbul edilə bilər. Bu gün Bakıətrafı ərazilərdə sənədsiz evlərin əksəriyyəti Dövlət Neft Şirkətinə (ARDNŞ) məxsus olduğu bildirilən torpaq sahələrində yerləşir. ARDNŞ tərəfindən Bakının bir sıra rayonlarda mövcud olan və mədən sahəsinə aid torpaqlarda tikildiyi idda edilən sənədsiz evlərə qarşı kütləvi məhkəmə iddiaları qaldırıb. Bu iddialarda həmin evlərin sökülməsi tələb olunur. ARDNŞ-nin Hüquq idarəsinin Hüquqi mübahisələrlə iş şöbəsinin rəisi Şahin İsmayılov saytına verdiyi məlumatda sənədsiz evlərə qarşı məhkəmələrə təqdim edilən iddiaların sayını açıqlayıb.
Şahin İsmayılov bildirib ki, Dövlət Neft Şirkəti tərəfindən təkcə Sabuncu rayon Məhkəməsinə 6 mindən çox sənədsiz evlə bağlı iddia ərizəsi göndərilib. Onun sözlərinə görə, Sabuncu rayon Məhkəməsi hazırda həmin iddiaları araşdırır.
ARDNŞ rəsmisi deyib ki, Bakının Xətai rayon Məhkəməsinə 440, Nizami rayon Məhkəməsinə isə 170 iddia ərizəsi təqdim edilib. ARDNŞ Səbail rayon Məhkəməsinə də 307-dən çox iddia ərizəsi göndərib.
//modern.az
