Səni Gözləmişəm - ŞEİR

Qəlbim sızlayanda bir yad elində,

Səni gözləmişəm, bəlkə də səni...

Ölüb getməmişəm cəllad əlində,

Səni gözləmişəm, bəlkə də səni...

Səadət yarıda atıb gedəndə,

Gəncliyim zamansız itib gedəndə,

Min insan yanımdan ötüb gedəndə,

Səni gözləmişəm, bəlkə də səni...

Hər dərdə, möhnətə baş əyəndə də,

Yolları xalıtək döşəyəndə də,

Buz kimi nəfəsdən üşüyəndə də

Səni gözləmişəm, bəlkə də səni...

Üstümdə şimşəklər çaxılanda da,

Qəriblik başıma qaxılanda da,

Təklikdən ürəyim sıxılanda da

Səni gözləmişəm, bəlkə də səni...

Kədərin, nisgilin qəm ocağında,

Qürbətin bu soyuq, qış qucağında,

Bir sirli məhəbbət üçbucağında

Səni gözləmişəm, bəlkə də səni...