"Azərbaycan Respublikasının Prezidenti İlham Əliyevin oktyabrın 16-da "Əhalinin sosial rifahının qorunması sahəsində əlavə tədbirlər haqqında" Sərəncamı bir daha sübut edir ki, ölkə başçısının müəyyən etdiyi dövlət siyasətinin mərkəzində Azərbaycan vətəndaşı və onun sosial rifahı dayanır. Ali Baş Komandan, Prezident İlham Əliyev hər zaman vətəndaşının sosial qayğısına qalır, onun daha da yaxşılaşdırılması mənafeyinə xidmət edən addımlar atır".
AZXEBER.COM xəbər verir ki, bunu "Pravda.az"-a açıqlamasında Milli Məclisin deputatı Elman Nəsirov deyib.
O, bildirib ki, hələ 2019-cu ildə əhalinin sosial vəziyyətinin yaxşılaşdırılması istiqamətində qəbul edilmiş sosial paketlər nəticəsində ölkədəki müavinətlər və təqaüdlər orta hesabla 92 faiz artırılıb, minimum əmək haqqı məbləği yüksəldilib: "Yeni Sərəncamda xüsusilə vurğulanıb ki, Azərbaycan dövləti yeni növ koronavirus (COVID-19) pandemiyasının bərpa dövrünə qədəm qoyub və pandemiya müddətində də sosial rifah məsələlərinə xüsusi önəm verib. Xüsusilə sahibkarların və işsizlərin sosial təminatında yaranmış çətinliklərin aradan qaldırılması istiqamətində xeyli məsələlər həyata keçirildi. Nəzərə almaq lazımdır ki, pandemiya dövründə sahibkarlara 4 dəfə 190 manat həcmində sosial yardımlar verildi və epidemioloji vəziyyətlə əlaqədar yaranmış iqtisa problemlərin həlli üçün 2.5 milyon manat vəsait xərclənib. Ötən ilin büdcəsinə əsasən, pandemiya ilə mübarizəyə ümumilikdə 261 milyon manat maliyyə vəsaiti ayrılıb. Bütün bunlar göstərir ki, əhalinin rihafı və sağlamlığı Ölkə Prezidentinin diqqətdə saxladığı prioritet məsələlərdir. Post-pandemiya dövrünün isə öz reallıqları var və dünya iqtisadiyyatı da post-pandemiya dövrünə daxil olmağa hazırlaşır. Həmin dövrdə müəyyən çətinliklərlə qarşılaşmaq normaldır".
E.Nəsirovun qeyd edib ki, yeni sərəncam dövlət başçısının hər an öz vətəndaşının yanında olduğunu bir daha sübut edir: "Dünyanın, eləcə də ölkə iqtisadiyyatının post-pandemiya dövründəki bərpa prosesi başlayıb, lakin iqtisadi fəallıq, istehsal olunan məhsullara tələbat artıdığı təqdirdə, həmin tələbatı təmin etmək dinamizmi nisbətən aşağıdır. Nəticədə, dünya bazarında qiymətlər qalxır və idxalçı ölkə kimi bir sıra məhsulların satışı ilə bağlı Azərbaycanda alıcılıq qabiliyyətinə mənfi təsir göstərir. Prezident İlham Əliyevin də yeni sərəncamının əsas məqsədi ondan ibarətdir ki, bu məsələlər araşdırılsın və 2022-ci ilin büdcəsində təqaüdlərin, pensiyaların, sosial müavinətlər və əmək haqqılarının müəyyən edilməsi mərhələsində reallıqlar nəzərə alınsın. Nəhayət, bir sıra sahələr üzrə ödənilən sosial ödənişlərin həcmi artırılsın. Sərəncam bir daha sübut edir ki, dövlət başçısı hər an vətəndaşının yanındadır, habelə onun sosial rifahı və sağlamlığı Prezident üçün bir nömrəli məsələdir".
