Yanvarın 30 -da “SOS Uşaq Kəndləri - Azərbaycan” Assosiasiyası Gənclər Gününə həsr edilmiş tədbir keçirəcək.
AssosiasiyadanAZXEBER.COM-averilən məlumata görə, artıq 1997-ci ildən etibarən, hər il fevralın 2-sində Azərbaycanda Gənclər Günü qeyd edilir. Bu gün cəmiyyətin inkişafında gənclərin iştirakını təmin edən imkanların müzakirəsi, gənclərin bu imkanlardan yararlana bilməsi, onların yaşadığı qayğılar və s. bu kimi mövzular gündəmə gətirilir.
SOS Uşaq Kəndləri –Azərbaycan, hər il olduğu kimi, bu dəfə də fürsətdən istifadə edərək, gənclər üçün önəmli olan məsələlərə diqqəti cəlb etmək qərarındadır.
Bu məqsədlə keçirilən növbəti tədbirdə SOS Uşaq Kəndləri-Azərbaycan Assosiasiyasının himayəsində olan gənclər, eləcə də təşkilat çərçivəsində həyata keçirilən müxtəlif inkişaf və təhsil imkanlarından bəhrələnən gənclər iştirak edəcəklər.
“Sağlam olmaq dəbdədir” çağırışı ilə gənclərə səslənən tədbirdə “Breyn Rinq” intellektual yarışması keçiriləcək. Bu populyar beyin yarışmasının əsas mövzuları isə tədbirin adından da göründüyü kimi, fiziki və mənəvi sağlamlıqdır. Əsrimizin bəlası olan HİV, Vərəm, Narkotiklər, Tütün alışqanlığı insanlara hansı ziyanlar vurur və bunun qarşısını almaq üçün nələri bilmək vacibdir? Bu sualları ən yaxşı cavablandıracaq komanda qalib sayılacaq. Qaliblər ictimai təşkilatların nümayəndələrindən ibarət münsiflər tərəfindən müəyyən ediləcək.
Bundan əlavə, SOS Uşaq Kəndlərinin 1-ci və 2 –ci Gənclər Evinin sakinləri, həmçinin digər alternativ qayğını tərk etmiş və tərk etməkdə olan gəncləri özündə birləşdirən Gənclərin Güvənc Körpüsü şəbəkəsinin üzvləri də bədii proqramla çıxış edəcəklər.
Hörmətli qonaqlar, Gənclər günündə bizimlə birgə olub gənclərin qağıyılarından, uğurlarından xəbərdar olmaq istəyirsinizsə, iştirak etmək fürsətini qaçırmayın. Hər birinizi bu tədbirdə görməkdən şad olardıq.
