"Jurnalistin yaydığı yanlış informasiya özünün mənfi təsirlərini ictimaiyyətdə göstərir. Əvvəldə peşəkarlıqdan söz açdıq. Məsələn, hansısa sosial şəbəkə profilində bilgi yayılır. Jurnalist ona şübhəli yanaşmağı bacarmırsa, yaxud bunu ağlından keçirmirsə, duymursa, ortada, yumşaq desəm, xoşagəlməz durum var".
AZXEBER.COM xəbər verir ki, bu sğzləri "İki Sahil" qəzetinə müsahibəsində Azərbaycan Mətbuat Şurasının sədri Rəşad Məcid deyib.
O sosial şəbəkələrdə yayılan saxta xəbərlər haqda da danışıb:
"Təəssüf ki, bu durumun ayrı-ayrı elemetlərini görürük. Burada bir çox məqamlardan söz açmaq, bir sıra problemləri sadalamaq mümkündür. Ayrı-ayrı xarakterik tendensiyaları diqqətə çatdırmaq da həmçinin. Ancaq onların hamısının üzərində dayanmağa ehtiyac yoxdur. Həm də ona görə ki, belə hallar mövzular şəklində qoyulmalı və müzakirə olunmalıdır. Məsələn, Mətbuat Şurasının Sosial Media ilə Əlaqələr Komissiyası bir müddət əvvəl bir məlumat yaydı. Məlumatda Gəncədə baş vermiş yeniyetmənin ölümü ətrafında yayılmış yanlış bilgilərin cəmiyyətdə doğurduğu ajiotaj diqqətə çatdırıldı, müvafiq tövsiyələr ünvanlandı. Şuranın Etika Komissiyasının da ayrı-ayrı hadisələrlə bağlı münasibəti olub".
Sədr jurnalist peşəkarlığı haqda da danışıb:
"Mətbuat Şurası cəmiyyətin total şəkildə yanlış məlumatlandırılması təmayüllərinə qarşı ictimai qınaq metodları ilə mübarizə aparır. Bütün bunların fonunda yenə ön plana peşəkarlıq gəlir. Nəzərə alaq ki, peşəkarlığın ən böyük göstəricisi həssaslıq və duyumdur. Jurnalist hər bir durumu hiss etməlidir. Yazdığı yazının cəmiyyət üzvlərində doğura biləcəyi mənfi və ya müsbət ovqatı hesablamağı bacarmalıdır. Bu onun məsuliyyətidir. Sosial media isə böyük ölçüdə, daha doğrusu, prinsip etibarilə məsuliyyətsiz məkandır. Bu məkanın bütün təmsilçilərindən həssaslıq tələb etmək doğru deyil. Deməli, peşəkar media malik olduğu keyfiyyətləri ön plana daşımalıdır ki, sosial media iştirakçılarının neqativ yüklü paylaşımları cəmiyyətin ümumi ahəngini pozmasın. Bu yolla jurnalist həm özünü, həm də cəmiyyəti qoruyacaq".
