Xəbər verdiyimiz kimi, sosial şəbəkələrdə dini inancları təhqir edən şəxs polis tərəfindən saxlanılıb. Üzeyir Abas adı ilə sosial şəbəkələrdə videolar paylaşan və dini inancları aşağılayan 1979-cu il təvəllüdlü şəxs barəsində prosessual tədbirlər davam etdirilir.
Məlumata görə, Səbail Rayon Məhkəməsinin qərarı ilə Üzeyir Abas inzibati qaydada həbs edilib.
Bu kimi əməllərə görə qanunvericilikdə nəzərdə tutulan məsuliyyəti yenidən gündəmə gətirib. Bəs dini etiqadı və dini inancları təhqir edən şəxsləri Azərbaycan qanunvericiliyinə əsasən hansı cəza gözləyir?
Hüquqşünas Ramil Süleymanov AZXEBER.COM-a açıqlamasında bildirib ki, Azərbaycan Respublikasında hər kəsin dini inancına hörmətlə yanaşılması tələb olunur:
"Azərbaycan Respublikasında hər kəsin dini inancına hörmətlə yanaşılması tələb olunur. Bu, Konstitusiya ilə təmin edilən hüquqdur. Dini nifrət və düşmənçiliyin salınması cinayət əməli hesab olunur. Azərbaycan Respublikasının cinayət məcəlləsinin 283-cü maddəsinə əsasən, milli, irqi və ya dini nifrət və düşmənçiliyin salınması, habelə milli, irqi və dini mənsubiyyətə görə vətəndaşların hüquqlarının məhdudlaşdırılması və ya bundan istifadə olunmaqla mediadan istifadə etməklə bu əməllərin törədilməsi cinayət məsuliyyəti yaradır. Belə hallarda 8 min manatdan 12 min manatadək cərimə, 2 ilədək müddətə islah işləri və ya 2 ildən 4 ilədək müddətə azadlıqdan məhrumetmə cəzası tətbiq oluna bilər”.
O qeyd edib ki, birbaşa şəxslərin ünvanına səsləndirilən təhqiramiz ifadələr də cinayət əməli hesab olunur:
"Eyni zamanda, birbaşa şəxslərin ünvanına səsləndirilən təhqiramiz ifadələr də Azərbaycan Respublikasının Cinayət Məcəlləsinin 148-ci maddəsinə əsasən cinayət əməli hesab olunur. Belə çıxışlarda, xüsusilə mediada şəxslərin ünvanına təhqiramiz ifadələrin səsləndirilməsinə görə 1000 manatdan 1500 manatadək cərimə, 240 saatdan 480 saatadək ictimai işlər və ya 6 ayadək müddətə azadlıqdan məhrumetmə cəzası təyin oluna bilər”.
Şahanə Ziyad
