Ötən həftə Türkiyənin F-16 qırıcısı tərəfindən vurulan Rusiyaya məxsus Su-24 təyyarəsinin pilotu Oleq Peşkovun cənazəsi Türkiyəyə gətirilib.
"Reuters"in verdiyi məlumatına görə, bu haqda Türkiyənin baş naziri Əhməd Davudoğlu bəyan edib.
Rusiyanın Ankaradakı səfirliyinin press-atteşesi İqor Mityakov pilotun cənazəsinin noyabrın 29-da Rusiya tərəfinə veriləcəyini bildirib.
Podpolkovnik Peşkov katapulta etdikdən sonra suriyalı döyüşçülər tərəfindən öldürülüb. Sağ qalan Su-24-ün şturmanı Konstantin Muraxtin isə müxtəlif dərəcəli zədələrlə xəstəxanaya yerləşdirilib.
Bundan əlavə insident yerində axtarış-xilasetmə əməliyyatında iştirak edən Mi-8 hərbi helikopterinin vurulması nəticəsində matros Aleksandr Poziniç həlak olub.
Su-24-ün şturmanıKonstantin Muraxtin
Rusiya prezidenti Vladimir Putin O.Peşkovu ölümündən sonra Rusiya qəhrəmanı adı ilə təltif edib. Muraxtin və Poziniç isə “Cəsarət” ordeninə layiq görülüblər.
Noyabrın 24-də Türkiyə qırıcıları Suriya ilə sərhəddə Rusiyaya məxsus hərbi təyyarəni vurublar. Məlumata görə, Su-24 təyyarəsi Türkiyə ilə sərhədi pozduğu üçün vurulub. Rusiya isə bu iddiaları təkzib edir.
Təyyarə ilə bağlı insidentdən sonra hər iki tərəfin dövlət başçıları sərt bəyanatlar səsləndiriblər. Rusiya lideri Vladimir Putin bunu Rusiyaya vurulan arxadan zərbə adlandırıb. Rusiya vətəndaşları bu ölkəyə səfər etməkdən çəkinməyə çağrılıb.
Suriya ilə sərhəddə vurulan rus təyyarəsindən sonra gərginləşən Rusiya-Türkiyə münasibətləri son günlər daha da gərginləşir. Ötən gün Rusiya Türkiyə ilə vizasız rejimi dayandırmaq barədə qərar qəbul edib.
Rusiya xarici işlər naziri Sergey Lavrovun sözlərinə görə, Türkiyə ilə vizasız rejim 2016-cı il yanvarın 1-dən dayandırılır: “Rusiya rəhbərliyi hazırda iki ölkə arasında qüvvədə olan vizasız rejimi dayandırmağa qərar verib”.
Ötən gün isə Vladimir Putin Türkiyəyə qarşı iqtisadi sanksiyaların tətbiqi haqqında fərman imzalayıb.
