Artıq bir neçə gündür ki, Ermənistan Silahlı Qüvvələri tərəfindən mövqelərimiz müxtəlif istiqamətlərdə atəşə tutulur. Bu da 11 noyabrda imzalanmış üçtərəfli imzalanmış bəyannamənin pozulması deməkdir.
Belə olan halda Azərbaycan antiterror əməliyyatına başlamalıdır?
AZXEBER.COM bu sualla Milli Məclisin deputatı Müşfiq Cəfərova müraciət edib.
Millət vəkili sülhməramlıların öz missiyasını yerinə yetirə blmədiyini qeyd edib:
"Artıq ard-arda bir neçə gündür mənfur düşmən atəşkəsi pozur. Bunun nəticəsində hətta hərbçilərimizdən 1 nəfər də yaralanıb. Bunlar bir daha aydın şəkildə göstərir ki, bölgədə olan sülhməramlılar öz missiyasını yerinə yetirə bilmir. Cəbhə bölgəsində gərginlik davam edir.
Dövlətimiz uzun illər münaqişənin sülh və dinc yolla həllinə çalışdı. Lakin nəticə olmadığından və tez-tez atəşkəsin pozulması 44 günlük Vətən müharibəsi və zəfərlə nəticələndi. Görünən odur ki, Ermənistan hakimiyyəti və terrorçuları 44 günlük müharibədən heç bir nəticə çıxartmayıb. Çox təəssüf ki mənfur qonşumuz hər vəchlə regionda sülhü gecikdirir və mane olur. Bu məsələ region dövlətlərini və bütün beynəlxalq təşkilatları narahat etməlidir. Ölkə başçısı dəfələrlə dünya birliklərini sülhün təminatında iştirak etməyə dəvət edib.
Deputat deyib ki, Ermənistan sülhə maraqlı deyil:
"Bu gün atəşkəsin pozulması bir daha sübut edir ki, nə həmin təşkilat və qurumlar, nə də ki Ermənistandakı hakimiyyət Qafqazda sülhə maraqlı deyillər. Biz hər zaman dünya birliyinin qəbul etdiyi qanunlara hörmətlə yanaşmışıq və icrasından boyun qaçırmamışıq. Cənab prezident dəfələrlə qeyd edib ki, Ermənistan terrorçu niyyətindən əl çəkməsə biz antiterror əməliyyatına başlayacağıq. Regionda sülh, sabitliyin bərpa olunmasına mane olan terrorçular cəzalandırılmalıdır. Qarabağ Azərbaycan ərazisidir, sülhməramlılardan başqa kimin əlində silah varsa və bu silah ordumuza doğrulursa həmin an tərki silah olunub, cəzası verilməlidir".
Günel Hüseynli
