"Avropadan göndərilmiş vizual kəşfiyyatçıların orada olma səbəbləri birmənalı şəkildə Azərbaycan və sərhədyanı kəndlərdəki kəşfiyyat xarakterli bütün məlumatları toplayaraq Avropaya və Ermənistana ötürməkdən ibarətdir. Onların Azərbaycanla sərhəddə gəlməsi sülhün bərqərar olmasına zərbə vuran vacib məsələlərdən biridir. Beynəlxalq səviyyədə bizim tələbimiz ondan ibarətdir ki, bu qüvvələr mütləq şəkildə sərhədboyu əraziləri tərk etməlidirlər".
Bu fikirləri AZXEBER.COM-a açıqlamasında Milli Məclisin deputatı Arzu Nağıyev Avropa İttifaqının (Aİ) dırnaqarası missiyasının Azərbaycanın Ermənistanla sərhəddində yerləşən Gorus şəhərində Azərbaycanla sərhəddə baxış keçirməsinə münasibət bildirərkən deyib.
Deputatın fikirlərinə əsasən, Ermənistanın bu cür təxribata hesablanmış çirkin addımlarına İran reaksiya verməlidir:
"Əsas məqam da odur ki, fevralın 20-də bunların vaxtının bitməsinə baxmayaraq ciddi cəhdlə Avropanın orada qalmasını, qeyri-qanuni mandatını uzatmağa səs veriblər. Bu, ilk növbədə Rusiyanın əleyhinə olan məsələdir. Digər bir tərəfdən, İran buna reaksiya verməlidir ki, NATO qoşunları ordulardan formalaşmış vizual kəşfiyyatçılar həmin ərazidə toplanıb. Başqa mühüm məqamlardan biri də budur ki, məhz İran rəsmi cavab vermirsə, deməli burada hansısa separatçı danışıqlardan söhbət gedə bilər".
Parlamentari hesab edir ki, bu məsələ tamamilə Rusiyanın diqqətində olmalıdır və belə təşəbbüslər sülh müqaviləsinin imzalanmasına ciddi zərbə vura bilər:
"Rusiya istər Azərbaycanın daxili və xarici siyasətinə müdaxilə edə bilməməkdən sonra, istərsə də öz siyasəti fiaskoya uğrayandan, Ukraynada qarşıya qoyulan məqsədlər yerinə yetirilə bilmədikdən sonra Ermənistandan istifadə edərək Cənubi Qafqazda məkrli siyasətini həyata keçirirlər. Buna nə ehtiyac var? Ermənistan Azərbaycan sərhəddində niyə hansısa Avropa Birliyinə (AB) daxil olan ölkələrdən gətirilmiş kəşfiyyatçılar dayanmalıdır? Bu, tamamilə absurd bir məsələdir. Sülh razılaşmasının imzalanmasına zərbə vuracaq ən ciddi amil kimi qiymətləndirilməlidir. Düşünürəm ki, bu çirkin məsələyə Fransa rəhbərlik edir. Hazırda 200 nəfərdən ibarət hərbi nümayəndəliyin açılmasının söhbəti gedir. Bütün proseslər sonda Cənubi Qafqazda yeni münaqişə ocağının yaranmasına gətirib çıxara bilər".
Mikayıl Mirzəzadə
