Bu gün Bakı Ağır Cinayətlər Məhkəməsində Sumqayıtda idmançının ölümünə səbəb olan Əhəd İsmayılov və onun oğlu Ramil İsmayılovun cinayət işi üzrə məhkəmə iclası davam etdirilib.
AZXEBER.COM Report-a istinadən xəbər verir ki, hakim Zeynal Ağayevin sədrliyi ilə keçirilən prosesdə dövlət ittihamçısı ittiham aktını elan edib.
Elan olunmuş ittiham üzrə Ə.İsmayılov özünü təqsirli bilmədiyini, oğlu R.İsmayılov isə qismən təqsirli bildiyini söyləyib.
Daha sonra R.İsmayılov sərbəst ifadə verib. O deyib ki, hadisədən əvvəl "PES" klubda mərhum Rasif Həbibovla mübahisə edib: "Mən uşaqlarla klubda "playstation" oynayırdım. Telefonum isə "zaryatka"da idi. Bu zaman Rasif kluba daxil olub, mənim telefonumun "adaptır"ını çıxarıb, öz telefonunu "zaryatka"ya qoydu. Ondan səbəbini soruşanda başıma sillə ilə vurub, yaxşı etdiyini söylədi. Sonra Rasif məni söyüb, döydü. Bizi oradakı uşaqlar ayırdı, ağlayıb evə getdim. Atam evdə yatmışdı. Onu yuxudan oyadıb, Rasifin məni təhqir edib, döydüyünü bildirdim. Atama deməyimin səbəbi isə bizi barışdırmaq idi. Çünkü Rasiflə atamın və qardaşımın münasibətləri daha əvvəl yaxşı olub. Sonra atamla birlikdə Rasiflə görüşməyə getdik".
Təqsirləndirilən şəxsin sözlərinə görə, "Yaşıl çay evi"ndə dostları ilə birgə olan R.Həbibova avtomobilə minməsini təklif ediblər: "Rasifin yanında bir neçə çəxs var idi. Atam Rasifə dedi ki, maşına minsin, onunla söhbət edəcək. Bu zaman onun dostu Samir də avtomobilə mindi. Samiri aravuran adam kimi tanıyırdım. Onun maşına minməsini istəmirdim. Lakin Samir zorla maşına mindi. Yolda atam Rasifdən məni nəyə görə döydüyünü soruşdu. Bu zaman Samir dilləndi ki, "Ramil uşaqlıq edib". Hər dəfə atam Rasifə sual verdikcə Samir özünü ortaya atırdı. Sonra avtomobili kənara çəkib, yerə düşdük. Yerə düşən kimi Samir məni yumruqla vurdu, Rasif isə atamı döyməyə başladı. Mən həmin zaman şokda idim. Yerdən qalxıb, tez maşından bıçağı götürdüm. Fikrim onları qorxutmaq idi. Bıçağı onlar tərəfə uzatdım, sonra hər iki şəxs bizdən uzaqlaşdı. Biz də maşına minib evə gəldik".
R.İsmayılov bildirib ki, bıçağı hadisədən sonra dənizə atıb.
Sualları cavablandıran təqsirləndirilən şəxs peşman olduğunu söyləyib.
Qeyd edək ki, hadisə ötən il Sumqayıt şəhərin 21-ci məhəlləsində baş verib. Dava zamanı Sumqayıt şəhər sakini olan iki nəfər - 1992-ci il təvəllüdlü Həbibov Rasif Asif oğlu və 1988-ci il təvəllüdlü Dadaşov Samir Tahir oğlu bıçaqlanıblar. Yaralılar dərhal xəstəxanaya çatdırılıb.
Lakin 4 gündən sonra R.Həbibov xəstəxanada dünyasını dəyişib.
Hüquq-mühafizə orqanların əməkdaşları tərəfindən hadisəni törətməkdə şübhəli bilinən ata-oğul Ramil və Əhəd İsmayılovlar saxlanılıb.
Hadisədə iştirak edən şəxslər qonşu olublar. Hadisə söyüş üstündə olub.
Faktla bağlı Sumqayıt Prokurorluğundan Cinayət Məcəlləsinin 126.3-cü (qəsdən sağlamlığa ağır zərər vurma, zərərçəkənin ölümünə səbəb olduqda) maddəsi ilə ittiham verilib.
Onu da qeyd edək ki, R.Həbibov idmançı olub.
