Son illərdə süni intellektin insanların gündəlik həyatında rolu getdikcə artıb. Xüsusilə psixoloji dəstək və məsləhət məqsədilə istifadə olunan süni intellektlə bağlı müxtəlif müzakirələr ortaya çıxır. Open Al araşdırması nəticəsində məlum olub ki, süni intellektlə həftədə 2 milyondan çox insan intiharla bağlı söhbətlər aparır. Bu yaxınlarda Amerikada da yeniyetmənin ölümü ilə bağlı ailə ChatGPT-ni günahkar sayıb.
Maraqlıdır ki, həqiqətən də süni intellekt insanları pis əməllərə yönləndirə bilərmi?
Mətbuat Şurasının İdarə Heyətinin üzvü Hacıbəy Heydərli bu barədə Patrulaz.az-a açıqlamasında bildirib ki, süni intellekt yalnız mövcud situasiyaya uyğun məsləhət verən vasitədir və insanı intihara sövq etmir:
"Düşünürəm ki, süni intellekt heç bir halda həkim, psixoloq və ya insanın ən yaxın dostu ola bilməz. Təbii ki, bunu süni intellekti istifadə edən ağıllı insanlar dərk edirlər. Süni intellekt yalnız mövcud situasiyaya uyğun olaraq insanlara yol göstərən bir vasitədir. Təəssüf ki, biz bunun şahidi oluruq ki, insanlar süni intellektə aludə olurlar və son zamanlar bəzi insanlarda süni intellektin təsiri daha çox ön plana çıxır. Bu çox təəssüfləndirici bir məqamdır.
Düşünürəm ki, həm də psixoloji bir problemdir ki, insanlar artıq səmimi ünsiyyəti süni intellektə qurban verirlər. Təbii ki, insan çətin vəziyyətdə olanda öz problemini ChatGPT vasitəsilə paylaşır və onun göstərdiyi yolları da nəzərdən keçirir. Belə hallar çoxdur və xüsusən intiharlarla bağlı məsələlərdə deyə bilərəm ki, süni intellekt insanı intihara sövq etmir. O yalnız mövcud situasiyaya uyğun öz məsləhətini verir və pis niyyətlə verilmiş sorğulara heç bir halda dəstək xarakterli məlumatlar təqdim etmir”.
Ekspertin sözlərinə görə, ChatGPT-lə intihara dair söhbətlər edənlər süni intellekti günahlandırmamalıdır, çünki o yalnız insanların sorğularını əks etdirir:
"Təəssüf ki, intihar halları, psixoloji gərginlik və depressiya bu gün dünyamızda çox geniş yayılmış bir problemdir və demək olar ki, dünya əhalisinin əziyyət çəkdiyi mövzulardan biridir. Süni intellektə bu məsələlərlə bağlı müraciətlər olması tamamilə normaldır. Yəni, süni intellekt olmadığı dövrdə də intiharlar mövcud idi. Amma bu gün artıq hər hansı mövzunu süni intellekt üzərinə atmaq düzgün deyil. Süni intellekt yalnız insanların güzgüsüdür. Cəmiyyət hansı mövzulardan maraqlanırsa, süni intellekt də həmin mövzularda suallar alır və cavab verir. Bu cavablar çox vaxt sonda neqativ halları ortaya çıxara bilər”.
