"Suyun qiymətinin qalxması ilə əlaqədar olaraq daha çox kənd təsərrüfatı məhsullarının maya dəyərində, su məhsullarında, təmizlik xidmətləri kimi fəaliyyət göstərən sahələrdə (maşın, xalça, geyim və digər əşyalarının yuyulması ilə bağlı xidmətlər) qiymət artımları olacaq".
Bu sözləri AZXEBER.COM-a açıqlamasında suyun qiymətinin qalxmasını şərh edən iqtisadçı-ekspert Rəşad Həsənov deyib.
İqtisadçı bildirib ki, dövlət inhisarçı olduğu sahələrdə qiymətləri qaldırdığı zaman cəmiyyətdə qiymət artımları ilə bağlı bir dalğa effekti yaranır:
"Qiymət artımında psixoloji faktor və kütlə davranışı da əsas rol oynayır. Dövlət qiymətləri qaldıran kimi bazar iştirakçıları hansısa formada öz mal və xidmətlərinin qiymətlərini mərhələli şəkildə artıracaq. Bu müəyyən bir dövr ərzində baş verəcək. Çünki bazarda qiymətin formalaşmasında diqtəedici faktorlardan biri də əhalinin istehlak gücüdür. Hazırda pandemiya ilə əlaqədar olaraq əhalinin istehlak gücü azalıb. Bu, şərtlər daxilində də qiymətlərin qaldırılması asan olmur. Amma bir çox məhsullar üzrə inhisarçılıq kifayət qədərdir. Bu inhisarçılıq sahibkarın mövqeyini dəstəkləyir və o, rahat şəkildə qiymət artımı edə bilir”.
Rəşad Həsənov onu da əlavə edib ki, yaxın müddətdə bütün seqmentlərdə qiymətlərin artımı müşahidə ediləcək:
"Proses sahibkarın bazarda mövqeyindən və statusdan asılı olaraq dəyişəcək. Rəqabətli şərtlər daxilində fəaliyyət göstərən sahibkarlar məcburən gözləmə mövqeyində qalacaq. Çünki qiymətlərin optimallığı vacib faktordur. Amma inhisarçı mövqeyində olanlar ən yaxın zamanda qiymət artımı istiqamətində hərəkətə keçəcək. Bazarda rahat şəkildə öz qiymət siyasətini diqtə edə biləcək”.
İqtisadçı yaşayış kompekslərində fəaliyyət göstərən özəl istixana xidmətlərinin də qiymətlərində artımların olacağını vurğulayıb.
Qeyd edək ki, yanvarın 31-də Tarif (qiymət) Şurasının iclasında "Azərsu” ASC-nin müraciəti müzakirə olunub və bir kubmetr su təchizatının tarifi ƏDV daxil olmaqla əhali üzrə Bakı, Sumqayıt, Xırdalan şəhərləri və Abşeron rayonu üçün 70 qəpik, digər inzibati ərazi vahidləri üzrə 60 qəpik, tullantı sularının axıdılması xidmətinin tarifi isə ölkə üzrə bir kubmetr üçün 30 qəpik səviyyəsində təsdiq olunub.
Qərar 2021-ci il fevralın 1-dən qüvvəyə minir.
Sevinc Yasinqızı
