Azərbaycan televiziyasının ilk futbol şərhçisi, əməkdar jurnalist Valid Sənaninin səhhətində ciddi problem yaranıb. Ailəsindən verilən məlumata görə, həmkarımız artıq bir müddətdir ki, yataq xəstəsidir. Vəziyyəti ağır olan V.Sənani demək olar ki, danışa bilmir, yemək yemir. Həkimlər onun xəstəliyinə konkret diaqnoz qoymaqda çətinlik çəkirlər. 3 il öncə ayağında başlayan ağrılar tanınmış şərhçinin sağalmaz xəstəliyə tutulmasına gətirib çıxarıb. Ailəsinin Bakıda müraciət etdiyi xəstəxanalardan, eləcə də İran və ABŞ-dan gələn həkimlər bildiriblər ki, bu xəstəliyin müalicəsi yoxdur.
Qeyd edək ki, Valid Sənani 12 may 1935-ci ildə Bakıda anadan olub. 1955-ci ildə Azərbaycan radiosunda diktor işləməyə başlayan V.Sənani 1957-ci il iyunun 9-da ilk dəfə televiziya vasitəsilə futbol matçını şərh edib. Uzun müddətli şərhçiliyi dövründə özünəməxsus səsi və şərhləri ilə yadda qalıb.
Bir sıra radiooçerklərin, radiokompozisiyaların müəllifi, Bakıda keçirilən mühüm dövlət tədbirlərinin, habelə keçmiş sovet respublikalarında Azərbaycanla bağlı tədbirlərin radio və televiziya ilə canlı yayımlarının aparıcısı olub.
1989-cu ildə “Əməkdar Jurnalist” fəxri adına layiq görülüb.
//lent.az
