Müzəffər Ali Baş Komandan İlham Əliyev 2020-ci il 27 sentyabrda əks-hücum əməliyyatı ilə başlayan 44 günlük Vətən müharibəsində düşmən üzərində qələbə qazanaraq tarixi nailiyyətə imza atdı. Döyüşlərdə bir addım da geri çəkilməyən Azərbaycan Ordusu düşmənə sarsıdıcı zərbə vuraraq, 44 gün ərzində – noyabrın 9-dək 5 şəhər, 4 qəsəbə və 300-dək kəndi işğaldan azad etdi.
Noyabrın 8-də Azərbaycanın mədəniyyət paytaxtı olan Şuşa şəhərinin azad edilməsi müharibənin taleyini həll edən ən mühüm hadisələrdən biri oldu. Şuşa zəfərindən sonra Ermənistan kapitulyasiya aktını imzalamağa məcbur qaldı və bununla da Azərbaycanın ərazi bütövlüyünün bərpası istiqamətində mühüm mərhələ başa çatdı.
Vətən müharibəsində qazanılan Qələbə xalqımızın milli birliyinin, Azərbaycan Ordusunun gücünün və dövlət rəhbərliyinin qətiyyətli siyasətinin nəticəsi kimi tarixə həkk olundu. Bu şanlı Zəfər ölkəmizin müasir tarixinin ən parlaq səhifələrindən biri olmaqla yanaşı, Azərbaycan xalqının iradəsini, vətənpərvərliyini və mübarizlik ruhunu bütün dünyaya nümayiş etdirdi.
Qələbədən sonrakı dövrdə azad edilmiş ərazilərdə genişmiqyaslı bərpa və yenidənqurma işlərinə başlanıldı, keçmiş məcburi köçkünlərin doğma torpaqlarına qayıdışı üçün zəruri infrastruktur layihələri həyata keçirildi. Bu proses Azərbaycanın regionda sülhün, sabitliyin və inkişafın təmin olunmasına verdiyi töhfənin bariz nümunəsidir.
Müəllif: Sərdar Balayev
Göygöl RİHB Aparatının sektor müdiri
