AZXEBER.COM xəbər verir ki, yazıçının özünün əvvəlcədən verdiyi anonslardan və həyat yoldaşı İlhamiyyə Rzanın mediaya açıqlamalarından məlum olur ki, Həmid Herisçi Təbrizdə baş verən hadisələri gündəlik formatında qələmə alır.
Yazıçı artıq iki gün – 8 və 10 mart 2026-cı il tarixlərində yaşadıqlarını sosial şəbəkə hesabında paylaşıb.
AZXEBER.COM həmin qeydləri olduğu kimi təqdim edir.
8 mart 2026
Saib küçəsində yerləşən pasport qeydiyyatı mərkəzinə getməyimiz əbəs oldu.
Dünən binanı vurublar.
Rəislər (məmurlar) eşikdə, avtomobildə əyləşərək müraciətləri başdansovdu cavablandırırlar.
– Qeydiyyata daha ehtiyac yox. Bu rəsmiyyətə artıq sərhəd keçid məntəqələrində fikir vermirlər.
Təbrizə qar yağsa da, bu gözəlliyə takılmağa vaxt yoxdu.
Rəsmi qaydaların defoltu, dəyərdən düşməyi şaşıdıcıdır.
Nə tez…
Deyəsən ABŞ uçaqları xəbərdarlıq göndərib rəsmi ünvanlara:
– İdarəni təcili boşaldın. Hədəfdəsiz.
"Pompeyin son günləri” deməzdim bu mənzərəyə.
Ancaq dövlət idarələri artıq öz məlum ünvanlarını dəyişir.
Artıq İranda qalma müddətim azaddır.
Azadlığın ilk nəfəsini çəkirəm köksümə.
Qarlı hava da qarışır bu nəfəsə.
Ciyərlərimi son dərəcə genişləndirir.
Saib Təbrizi kimi şairin adını daşıyan bu küçə deyəsən ilk dəfə özünə bədii bir məzmun qazanır.
10 mart 2026. Gecənin xain vaxtı
Oteldə deyəsən məndən başqa kimsə yoxdu.
Şair dostum Əli Caglanın bu dəfə gec gəlməsinin səbəbi bəlli oldu:
– Avtomobilimi cərimə meydançasına apardılar bayaq.
Mövzunu çox təbii qəbul edirəm.
Hələlik avtomobili həbs etdilər.
Xəbərdarlıqdır Təbrizsayağı.
Sabah bizi də həbs edə bilərlər.
Anons verildi.
(Davamı var)
Sonda qeyd edək ki, Həmid Herisçi hazırda da İranın Təbriz şəhərindədir. Özünün verdiyi açıqlamaya görə, orada qalıb, hadisələri izləyərək, kitab yazır. Yazıçı oxuduğunuz bu qeydləri həyat yoldaşı İlhamiyyə Rzanın WhatsApp hesabına göndərib (yol taparaq bu qeydləri çatdıra bilib).
/musavat.com
