Nazirlik Tələbə Qəbulu üzrə Dövlət Komissiyasının dərslik səhvlərini geniş ictimaiyyətə bəyan etməsini düzgün saymır.
Xəbər verildiyi kimi, Tələbə Qəbulu üzrə Dövlət Komissiyasının (TQDK) sədri Məleykə Abbaszadə Azərbaycanda orta məktəb dərsliklərində ciddi nöqsanlar olduğunu açıqlayıb. Komissiya sədri xüsusilə bu il çap olunan biologiya və tarix dərsliklərində səhvlər olduğunu deyib. “Abituriyent” jurnalının yanvar ayında çap olunacaq 1-ci sayında isə dərsliklərdə olan səhvlər haqda düzəlişlər veriləcək. Jurnalın 12 səhifəsi bu səhvlərə həsr olunacaq. Tələbə Qəbulu üzrə Dövlət Komissiyasının biologiya fənni üzrə Ekspert Şurasının sədri Tariyel Heybətov nazirliyin bəzi dərsliklərində artıq əvvəllər rast gəlinən qüsurların düzəldildiyini, lakin hələ də kifayət qədər qüsurlara rast gəlindiyini deyir. “Əsas səhvlər biologiyadadır, bəzi şeylər Azərbaycan dilində olanda bir cürdür, ruscada başqa cür. Şəkillərdə səhvlər var. Məsələn, bir heyvanın şəklinə başqasının adını yazıblar”,- deyə Tariyel Heybətov vurğulayır. Müstəqil ekspertlər də dərsliklərdə müəyyən qüsurlar olduğunu deyirlər. Azad Müəllimlər Birliyinin sədri Dilşad Nağıyeva dərsliklərdə səhvlərin olduğunu bildirir: “Bu səhvlər uşaqlarda onlara qarşı inamsızlıq yaradır, onların həmin fənnə olan marağını azaldır. Kurrikulum proqramına uyğun dərsliklər yazılır. Amma dərsliklər çox çətinləşdirilir”,- deyə o vurğulayır. Təhsil Nazirliyində də dərsliklərdə bəzi səhvlərin getdiyini etiraf edirlər. Lakin Tələbə Qəbulu üzrə Dövlət Komissiyasının bu səhvləri geniş ictimaiyyətə bəyan etməsini düzgün saymırlar. Təhsil Nazirliyinin dərslik və nəşriyyat şöbəsinin müdiri Faiq Şahbazlı bu barədə bunları deyib: “Bu səhvləri demək olar. Amma bunu niyə belə şişirtmək lazımdır, başa düşmürəm? Bunlar xırda səhvlərdir. TQDK tələbə qəbulu il məşğul olmalıdır. Onlar bizim dərsliklərdən istifadə edib “şparqalka” hazırlayırlar. Uşaqları ətraflı elmdən uzaqlaşdırırlar”. Tələbə Qəbulu üzrə Dövlət Komissiyasının mətbuat xidmətinin rəhbəri Elnur Nağızadə isə komissiyanın çap etdirdiyi bu vəsaitlərin Təhsil Nazirliyinin dərsliklərini əvəz etmədiyini, sadəcə abituriyent və müəllimlərə kömək məqsədi daşıdığını bildirdi. Xatırladaq ki, Tələbə Qəbulu üzrə Dövlət Komissiyası orta məktəb dərsliklərində səhvlərin olduğunu bundan əvvəl də bir neçə dəfə deyib.
