Telefonun batareyası azaldıqca ekranda xəbərdarlıq bildirişləri görünür. Xüsusilə batareya 20%-ə çatanda gələn "Batareya azdır” mesajı demək olar ki, bütün smartfon istifadəçilərinə tanışdır.
AZXEBER.COM xəbər verir ki, bu həddin seçilməsi təsadüfi deyil. Telefon istehsalçıları 20%-lik göstəricini istifadəçiyə cihazın enerji səviyyəsinin kritik həddə yaxınlaşdığını əvvəlcədən xatırlatmaq üçün müəyyənləşdirirlər.
Batareya 20%-ə düşəndə telefonun işləməsi üçün hələ kifayət qədər enerji qalsa da, istifadəçinin cihazı şarj etməsi və ya enerji sərfiyyatını azaltması üçün xəbərdarlıq edilir. Əks halda batareyanın tamamilə tükənməsi və telefonun sönməsi riski artır.
Bu bildiriş eyni zamanda istifadəçiyə vaxt qazandırır. Məsələn, telefonun qarşıdakı saatlarda vacib zəng, mesaj və ya digər funksiyalar üçün lazım olacağı halda, şəxs əvvəlcədən enerji mənbəyi axtara bilər.
Bəzi smartfonlarda 20%-dən sonra enerji sərfiyyatını azaltmaq üçün "Enerjiyə qənaət rejimi”nin aktivləşdirilməsi də təklif olunur. Bu zaman ekran parlaqlığı, arxa planda işləyən tətbiqlər və digər funksiyalar məhdudlaşdırıla bilər.
Maraqlıdır ki, 20% göstəricisi batareyanın mütləq həmin anda sıradan çıxacağı anlamına gəlmir. Bu, daha çox istifadəçiyə verilən əvvəlcədən xəbərdarlıq həddidir. İnsanların böyük hissəsi telefonu gün ərzində intensiv istifadə etdiyi üçün belə xəbərdarlığın məhz bu səviyyədə verilməsi praktik baxımdan məqsədəuyğundur.
Fəridə Əsədzadə
