Fevralın 16-da intihar edən Azərbaycan Tibb Universitetinin hərbi tibb fakültəsinin ikinci kurs tələbəsi Elvin Əsgər oğlu Qasımovla bağlı Nəsimi Rayon Prokurorluğunda istintaq davam etdirilir. Tələbənin özünü hansı səbəbdən asması ilə bağlı hələlik rəsmi məlumat yoxdur.
Elvinin yaşadığı 6 saylı tələbə yataqxanasındakı dostları, qrup yoldaşlarıyla söhbətlərdən məlum olub ki, o, pulsuzluqdan əziyyət çəkib. Daha doğrusu, imtahanlarda kəsiri olduğu üçün ondan pul istəyiblər, amma onun tələb olunan məbləği ödəməyə imkanı olmayıb. Son nəticədə də özünü öldürmək qərarına gəlib.
“Yeni Müsavat” Elvinin qohumlarına istinadən yazır ki, onun “Anatomiya” fənni üzrə müəllimi ilə narazılığı olub. Baxmayaraq ki, “Anatomiya” Elvinin ən çox maraq göstərdiyi fənlərdən olub. Digər fənlərdən zəif olsa da, bu fənni çox yaxşı oxuyurmuş.
Tibb Universitetinin prorektoru Sabir Əliyev isə tələbənin intiharının imtahan kəsirləri ilə əlaqəsinin olmadığını deyir: “Heç bir tələbədən pul tələb olunmayıb. Digər tərəfdən, hazırda imtahan sessiyaları başa çatıb və tələbələrin kəsirlərini düzəltmək vaxtı deyil. Həmin tələbə də çox normal bir tələbə idi və universitetdə heç bir problemi yox idi. Amma real yanaşsaq, kəsiri olanlar da sonradan imtahanlarını verirlər. Buna görə intihar etmək real görünmür. Həmin tələbə isə yəqin ki, depressiyada olub və bu addımı atıb. Ola bilər ki, universitet və ailədən kənar bir məsələ ilə bağlı intihar edib”./// azadliq.info
