Hacıbəy Heydərli
Dünyanın heç bir ölkəsində "Tiktok" Azərbaycandakı qədər siyasiləşməyib. "Tiktok"un Azərbaycan seqmenti günü-gündən çirkin əməllərin episentrinə çevrilir.
Əlində baltaynan metroynan girən usta da, avtoxuliqanlıq edən də, xaricdə oturub öz tərbiyəsizliyini nümayiş etdirən də, məktəbdə müəlliminin başına oyun açan şagird də, otelə qıznan gedən "qaqaş" da, özünü yandırmağa hazırlaşan qazimiz də həmin anları "tiktok"da paylaşır.
Ölkəmizdə aqressiya da, psevdo məlumatlar, saxta, "feyk" videolar da məhz oradan tirajlanır.
Heç şübhəsiz ki, bu gün ölkə üçün ən böyük təhdid "tiktok" sosial şəbəkəsidir. "Tiktok"da alqoritm elə qurulub ki, heç bir izləyicisi olmayan adam tək bir paylaşımla milyonlarla insana nüfuz edə bilir. Azərbaycan auditoriyasının da mütləq əksəriyyəti orada toplaşıb. "Facebook"dakılar "Tiktok"a yuxarıdan aşağı baxsalar da, reallıqda əksərimiz oradayıq, cəmiyyətimiz, xalqımız oradadır.
Çıxış yolu isə birdir: hər yeniliyə balta çalmaq olmaz. Dünya dəyişirsə, biz də dəyişməliyik, inteqrasiya etməliyik. Lazım olan yerlərdə olmalıyıq ki, beynimizi qeyri-peşəkar və fürsətcillərin əlinə verməyək.
Dövlətimizin gördüyü işlər "tiktok"da gündəm olmalıdır, ancaq çox təəssüf ki, olmur. Səbəb isə odur ki, peşəkar adamlar kənara çəkilib, sanki nədənsə qorxurlar. Ancaq qorxmaq zamanı deyil, meydanda olmalıyıq. "Facebook"da statusuna 10 "like" gələn insanlar kütlənin toplaşdığı yerlərdə yoxdursa, onların təhlilləri kimə lazımdır? Nəyə görə meydanı Azərbaycanı sevməyən insanlara vermişik? Nəyə görə dövlətimizin qazilərə, şəhid ailələrinə qayğısını sosial şəbəkələrdə təbliğ edə bilmirik? Nəyə görə qazilərin problemi "tiktok"a çıxmalıdır? Axı onlar hər şeydən öncə dəstəyi dövlətdən umur və dövlətdən görür.
Bu sualların cavabı isə odur ki, sosial media ilə iş düzgün qurulmalıdır, oraları ciddiyə almaq lazımdır. Dövlətimizin gördüyü işlər düzgün təbliğ olunmalıdır, susmaq, kənara çəkilmək zamanı deyil.
Əks halda çox gec ola bilər.
