Qazaxıstan Prezidenti Kasım-Jomart Tokayev müdafiə nazirinin iki müavinini və Qazaxıstan Hərbi Dəniz Qüvvələrinin baş komandanını vəzifələrindən azad edib.
Bu barədə "Akorde" nəşri məlumat verib.
Prezidentin mətbuat xidmətindən qeyd edilib ki, dövlət başçısı bir sıra sərəncamlar imzalayıb:
Kanış Abubakirov Qazaxıstan Respublikası müdafiə nazirinin birinci müavini və Silahlı Qüvvələrin Baş Qərargah rəisi vəzifəsindən azad edilib, Almaz Cumakeyev müdafiə nazirinin müavini vəzifəsindən uzaqlaşdırılıb. Kanat Niyazbekov isə Qazaxıstan Respublikası Silahlı Qüvvələrinin Hərbi Dəniz Qüvvələrinin baş komandanı vəzifəsindən azad edilib".
Xatırladaq ki, sentyabrın 24-də Xəzər dənizində təlimlər zamanı 17 hərbçini su aparıb. Onlardan üçü xilas edilib, 14-ü həlak olub.
Bundan əvvəl bloqerlərdən biri Xəzər dənizindəki faciədən sonra yaralı hərbçinin videosunu yayımlayıb.
Qazaxıstan Baş Prokurorluğunun daha əvvəl bildirdiyinə görə, onların ölümündə şübhəli bilinənlər artıq müəyyən ediliblər. Hadisə ilə əlaqədar 25 sentyabr ölkədə Ümumxalq Matəm Günü elan edilib.
//Oxu.az
