ANS şirkətlər qrupunun prezidenti Vahid Mustafayev ANS-ə müsahibəsində seyrçiləri ifrat şou-proqramlarla bağlı məsələdə səbirli olmağa çağırıb. V.Mustafayev bildirib ki, şou verilişlərinin tamaşaçı reytinqi yüksək olduğu üçün belə proqramlar efirlərdə çoxdur: “Reytinqlərin bu gün inkişafda olan Azərbaycan televiziyasına göstərdiyi təzyiqi nəzərə alaraq, bunu sözsüz ki, bir mərhələ olaraq qəbul etmək lazımdır. Azərbaycan bu gün inkişaf edir. Azərbaycan televiziyası bütöv Azərbaycan anlayışının bir hissəsidir. O da inkişaf edir. Tənqid edən insanlarla bir çox hallarda mən razıyam. İfrat dərəcədə verilişlər istehsal olunur və düşünürəm ki, tənqid edən insanlar mənim kimi səbirli olmalıdır. Bu sahə Azərbaycanda gəncdir. Sözsüz ki, mən də istəyirəm ki, bizim televiziyalar CNN, NBC, CBS tək inkişaf etmiş bir televiziya olsun. Amma gəlin baxaq onların tarixinə: 60 il, 70 il onların tarixi var. Bizimki isə ANS olaraq cəmisi 20 ildir”.

V.Mustafayev onu da bildirib ki, televiziya verilişlərinə reytinq müəyyənləşdirən təşkilatlar bu reytinqləri almaq üçün ildə 30 min manatdan çox pul xərcləyirlər. Telekanal rəhbəri müsahibəsində Azərbaycanda televiziya assosiasiyasının yaranmasının vacib olduğunu da vurğulayıb. Onun fikrincə, televiziya assosiasiyası telekanallarla bağlı bütün məsələlərə hansısa bir pozitiv nöqteyi-nəzərdən son qoya bilər./// Yeni Musavat