Azərbaycanda toylarda qonaq sayı üçün mövcud olan 150 nəfərlik limit, 250-300-ə qədər qaldırılması müzakirə olunsa da, yaslardan hələ də xəbər yoxdur.
Toy bazarının bir neçə iştirakçısı iddia edir ki, mövcud məhdudiyyət fevral ayından sonra artırıla bilər. Hazırda toylarla bağlı qaydalara əsasən, toyların yalnız 150 nəfərədək keçirilməsinə icazə verilir.
Sözügedən informasiya sosial şəbəkələrdə ciddi müzakirələrə səbəb olub. Belə ki, toyların, nişanların keçirilməsinə icazə verilsə də, Nazirlər Kabineti yanında Operativ Qərargah 14 mart 2020-ci ildəki qərarına əsasən dəfn mərasimləri istisna olmaqla, mərasim zallarında, çadırlarda və digər qapalı məkanlarda yas mərasimlərinin keçirilməsi hələ də qadağandır.
AZXEBER.COM-a açıqlama verən ilahiyyatçı Hacı Təyyar yasların da, toylar kimi eyni şərtlərlə keçirilə biləcəyini deyib. O, mövcud qadağanın yaxınlarını itirən insanları çox incitdiyini bildirib:
"Bir neçə ay öncə bildirmişdilər ki, müəyyən məhdudiyyətlərlə yas mərasimləri təşkil olunacaq. İnsanlar bu dəqiqə bu problemdən ciddi əziyyət çəkirlər. Bu isə tamamilə məntiqsizdir. Pandemiyanı, karantin qaydalarını gözləməklə yas mərasimlərinin də keçirilməsi mümkündür. Quranda da bildirilir ki, təhlükəyə tərəf getməyin, yəni insanlar karantin üçün tətbiq olunan bütün qaydaları toyda da, yasda da, başqa yerlərdə də eyni riayət etməlidir. Toy ilə müqayisədə yaslar daha ağıllı keçirilir. Çünki toylarda insanlar içir, nə etdiklərini bilmirlər, gedib bir-birlərini qucaqlayıb, öpürlər. Məlum məsələdir ki, spirtli içki qəbul edən insana məsafəli əyləş deyə qayda qoymaq mümkün olmaz. Yas mərasimlərində isə tamamilə fərqlidir, əksinə insanlar burada duyğulu olur. Xüsusən də yaxınları koronavirusdan dünyasını dəyişən insanlarda bu virus fobiya kimi qalır. Mən düşünürəm ki, bu insanlar yasda iştirak etsələr, karantin qaydalarına daha çox əməl etmiş olarlar”.
İlahiyyatçının sözlərinə görə, yaslara ilkin başlanğıcda 50 nəfərin iştirakı ilə icazə vermək olar:
"Mənim təklifim bu olardı ki, yas mərasimlərinə də heç olmasa, 50 nəfərin iştirakı ilə icazə verilsin. Tibbi maska, spirt və sosial məsafəni gözləyərək insanlar öz yaxınlarının yas mərasimində iştirak etsinlər. Mən dəfələrlə insanların bu mövzuya həssas yanaşdığının şahidi olmuşam. Çünki insanlar da öz yaxınları üçün bir mərasim təşkil edib, son dəfə ölüləri üçün ağlamaq istəyirlər. Toy mərasimlərində olduğu kimi yas mərasimlərində də polis nəzarəti altında vaksin pasportları yoxlanılsın və bu mərasimlər də təşkil olunsun.”
Ayşən Mirzəyeva
