İmişli rayonunda baş vermiş hadisə zamanı 3 nəfər xəsarət alıb
İmişlidə toyda baş verən bıçaqlanma zamanı 3 nəfər xəsarət alıb. Toya gələnlər arasında dava musiqi sifarişi üstündə düşüb. Bu, toyda baş verən ilk belə hadisə deyil. Toy məclislərində bu cür xoşagəlməz hadisələrə nəzər saldıqda, aydın olur ki, sonu bir çox hallarda ölüm və ya bir neçə nəfərin yaralanması ilə başa çatan qalmaqalı daha çox içkili şəxslər törədir. Bu üzdən əksər vətəndaşlar toyda içkinin verilməsinin əleyhinədir. Bəs toy şənlyində spirtli içkinin verilməsi nə dərəcədə məqsədə uyğundur? Qeyd edək ki, son dövrlər içkisiz toy mərasimlərinin sayı artmaqdadır. Apardığımız sorğu da göstərir ki, istər toya dəvət olunanlar, istərsə də toy etməyə hazırlaşanlar öz şənliklərinin sakit və qalmaqalsız keçməsi üçün menyudan spirtli içkilərin çıxarılmasına və ya azaldılmasına üstünlük verir. Millət vəkili Hadı Rəcəbli hesab edir ki, ümumilikdə Azərbaycanda el şənliklərinin və toy mərasimlərinin keçirilmə mədəniyyəti yüksəlməlidir. Çünki hazırkı toy mərasimləri yalnız israfçılıq və səs-küylə yadda qalır. Bu səbəbdən cəmiyyətdə nümunəvi mərasimlərə ehtiyac var. İstənilən halda toya gələn hər kəs çalışmalıdır ki, toy süfrəsindəki içki bolluğundan və toy sahibinin səxavətindən istifadə edib həddən artıq içki içməkdən, xoşagəlməyən hərəkətlər etməkdən uzaq olsun. Necə deyərlər sonda toya toy tutmasın.
