ABŞ Prezidenti Donald Tramp texnologiya milyarderi İlon Maskı öz müşavirləri ilə söhbətlərində "50 faiz dahidir, 50 faiz uşaq" kimi xarakterizə edib.
AZXEBER.COM Oxu.Az-a istinadən xəbər verir ki, bu barədə "The Wall Street Journal" (WSJ) məlumat yayıb.
Nəşr Ağ Evdəki mənbələrə istinadla qeyd edir ki, Trampın başqa bir "proporsiya" ifadəsi də olub: "90 faiz dahi, 10 faiz uşaq".
Prezidentin bu qeydləri, Maskın rəhbərlik etdiyi Hökumət Effektivliyi Departamenti (DOGE) çərçivəsində gördüyü işlərdən narazılığını göstərir.
Mənbələrin sözlərinə görə, Tramp bir dəfə müşavirlərinə Maskın 1 trilyon dollar büdcə qənaətinə dair vədinin "boş söz" olub-olmadığını soruşub. Bu sual prezidentin Maskın real təsirinə şübhə ilə yanaşdığını ortaya qoyub.
Qeyd edilir ki, Mask tez-tez yüksək vəzifəli məmurlarla razılaşdırmadan qərarlar verib və bu da Ağ Evdə narazılığa səbəb olub. O, hətta prezidentin yaxın müşavirlərindən biri və Ağ Evin aparat rəhbəri Süzan Uaylsla da koordinasiyaya getməyib. Nəticədə Tramp müdaxilə edərək Uaylsa Maskın komandasına ciddi nəzarət etməyi tapşırıb.
Mənbələr bildirirlər ki, Tramp Maskın nazirlərə qarşı kəskin və hörmətsiz davranışlarından da narazı qalıb. O, kabinet iclaslarından birində Maskın digər administrasiya üzvlərinə qarşı "çirkin şəkildə" davrandığını eşidəndə təəccübünü gizlədə bilməyib.
Bundan əlavə, Mask Trampın yüksək gömrük rüsumlarının tətbiqi təşəbbüsünü və dövlət xərclərinin azaldılmasına dair qanun layihəsini açıq şəkildə tənqid edib.
Maskın administrasiyanı tərk etdiyini Tramp şəxsən deyil, onun "X" platformasında paylaşdığı postdan öyrənib.
Buna baxmayaraq, Tramp Maskla münasibətlərini isti saxlayır. Cümə günü keçirilən ortaq mətbuat konfransında o, milyarderə təşəkkür edib və gələcəkdə onun tövsiyələrinə qulaq asacağını istisna etməyib.
