“Bakıya ilk dəfə 1990-cı ildə gəldim, Dağlıq Qarabağ münaqişəsinə, Gəncədə Surət Hüseynov qiyamına şahid oldum. 1994-cü ildə Bakıdan Çeçenistan-Rusiya savaşına yollandım. Buraya gəlişim köhnə dostumla yenidən görüşüb həsrət təzələmək kimi bir duyğudur. Yeni gəlişimdə daha canlı bir şəhər gördüm” .
Bu fikirləri Heydər Əliyevdən müsahibə alan ilk türk jurnalist kimi adı tarixə yazılan “TRT”nin yeni Bakı təmsilçisi Yıldıray Arslan Aktual.az-a danışıb. O, Bakıda yenidən olmaqdan məmnunluğunu ifadə edib.
Qeyd edək ki, Yıldıray Arslan 1990-cı illərdən bəri, müxbir olaraq, Qarabağ müharibəsi və Azərbaycanda baş verən hadisələri dünyaya çatdıran ilk türk jurnalistlərdən biri olub. Y. Arslan Dağlıq Qarabağ münaqişəsinə, Azərbaycanın müstəqillik yolunda ilk addımlarına şahidlik edib. O, Qarabağ müharibəsini, Ankarada Elçibəy-Petrosyan görüşməsini, Gəncədə Surət Hüseynov qiyamını xəbər və müsahibələri ilə dünyaya çatdıran ilk xarici jurnalistlərdəndir. Yıldıray Arslan, eyni zamanda, ümummilli lider Heydər Əliyevdən müsahibə alan ilk türk jurnalist olaraq da tarixə düşüb. Yeni təmsilçi Azərbaycan-Ermənistan müharibəsi ilə yanaşı, Bosniya, Birinci Körfəz və çeçen-rus müharibələrini də fəal şəkildə işıqlandırıb, çeçen-rus müharibəsində paytaxt Qroznıya girən ilk türk jurnalist olub. TRT-də xəbər departamentində müxbir, xəbər müdiri, departament sədrinin müavini və sədr vəkili vəzifələrini icra edib. Hazırda Türkiyədə Parlament müxbirləri dərnəyi, Prezident Administrasiyası və Baş nazirlik müxbirləri dərnəyi, Ankara Jurnalistlər Cəmiyyəti, KİV İxtisas Jurnalistləri federasiyasında da sədr vəkili vəzifəsini icra edir.
Azərbaycanlı xanımla ailə həyatı quran Y. Arslan bir oğul atasıdır. İllər sonra təkrar Azərbaycana, təmsilçi olaraq, qayıdan Y. Arslan bunun ona qürur və şərəf verdiyini qeyd edib. O, dost və qardaş ölkələrin yayım qurumları arasındakı işbirliyinin daha da möhkəmlənməsi və inkişafı üçün bütün səylərini səfərbər edəcəyini söyləyib.
