Azərbaycanın aparıcı banklarından biri olan TuranBank ASC ilə İslam İnkişaf Bankı (IsDB) Qrupuna üzvü olan Beynəlxalq İslam Ticarət Maliyyəsi Korporasiyası (ITFC) arasında beynəlxalq ticarət əməliyyatlarının maliyyələşdirilməsini genişləndirmək məqsədilə 10 milyon ABŞ dolları məbləğində kredit sazişi imzalanıb. Saziş beynəlxalq ticarət əməliyyatları üçün maliyyələşmə həllərini şaxələndirməyi, kiçik və orta sahibkarlıq (KOS) subyektlərinin maliyyə resurslarına çıxış imkanlarını artırmağı hədəfləyir.
Strateji tərəfdaşlığın əsas məqsədi ölkələrarası idxal-ixrac əməliyyatlarını genişləndirmək, Azərbaycanda beynəlxalq ticarət fəaliyyətini stimullaşdırmaq, habelə özəl sektorun, xüsusilə də kiçik və orta sahibkarlıq (KOS) subyektlərinin maliyyə resurslarına əlçatanlığını təmin etməkdir. Saziş çərçivəsində ayrılmış vəsait yerli müəssisələrin ixrac potensialının gücləndirilməsinə və ölkə iqtisadiyyatının qeyri-neft sektorunun dayanıqlı inkişafının dəstəklənməsinə yönəldiləcək.
ITFC-nin Əməliyyat üzrə Baş Direktoru Nazim Noordali: "TuranBank ilə qurulan tərəfdaşlıq, üzv ölkələrdə dayanıqlı iqtisadi artımın hərəkətverici qüvvəsi olan özəl sektorun və kiçik və orta sahibkarlığın (KOS) rolunun möhkəmləndirilməsinə dair davamlı öhdəliyimizin bariz nümunəsidir. ITFC-nin ticarətin təşviqi və ticarət maliyyələşdirilməsinə çıxış imkanlarının artırılması missiyamıza müvafiq olaraq, bu əməkdaşlıq İslam maliyyələşdirmə həllərinin miqyasını genişləndirəcək və KOS-ların beynəlxalq ticarət əməliyyatlarını artırmasına lazımi dəstəyi təmin edəcəkdir."
TuranBank-ın İdarə Heyətinin sədri Orxan Qarayev: "ITFC ilə imzaladığımız bu saziş ölkənin ticarət dövriyyəsinin canlandırılmasına xidmət edir. Sözügedən maliyyə xətti müştərilərimizə daha çevik ticarət həlləri təklif etməyə və onlara qlobal bazarlarda geniş imkanlar yaradacaqdır. Eyni zamanda, bu əməkdaşlıq TuranBank-ın beynəlxalq maliyyə bazarlarındakı aktiv fəaliyyətinin və yerli sahibkarlıq subyektlərinə göstərdiyi davamlı dəstəyin növbəti göstəricisidir”
Bu saziş ITFC-nin Azərbaycandakı fəaliyyətinin artan dinamikasını təsdiq edir və hər iki qurumun özəl sektor üçün ticarətin maliyyələşdirilməsi həllərinin təkmilləşdirilməsi istiqamətindəki ortaq hədəflərini əks etdirir.
TuranBank haqqında:
TuranBank ASC 1992-ci ildə təsis edilmiş və Azərbaycan maliyyə sektorunda fəaliyyət göstərən ən sabit və etibarlı qurumlardan biri kimi tanınır. Bank, müştərilərinə beynəlxalq standartlara uyğun geniş çeşidli maliyyə xidmətləri təqdim edir. Hazırda ölkə üzrə 22 xidmət nöqtəsi ilə fəaliyyət göstərən TuranBank, 33 illik fəaliyyəti ərzində dayanıqlı inkişaf nümayiş etdirib. Bank şəffaflıq, etibarlılıq və sosial məsuliyyət prinsiplərinə sadiqliyi ilə seçilərək, ölkənin bank sektorunda mühüm rol oynamaqda davam edir. Ətraflı məlumat üçün: www.turanbank.az
Beynəlxalq İslam Ticarət Maliyyə Korporasiyası (ITFC) haqqında:
Beynəlxalq İslam Ticarət Maliyyə Korporasiyası (ITFC) İslam İnkişaf Bankı (IsDB) Qrupunun üzvüdür. 2008-ci ilin yanvar ayından fəaliyyətə başlayan ITFC, İslam Əməkdaşlıq Təşkilatına üzv ölkələrin ehtiyacları üçün 92 milyard ABŞ dollarından çox maliyyə vəsaiti ayıraraq, bu ölkələr üçün ticarət həllərinin aparıcı təminatçısına çevrilib. İslam Əməkdaşlıq Təşkilatına üzv ölkələrdə və ondan kənarda ticarətin inkişafı üçün hərəkətverici qüvvə olmaq missiyasını daşıyan Korporasiya, üzv ölkələrdəki qurumların ticarətin maliyyələşdirilməsi imkanlarına daha rahat çıxışını təmin edir və onlara qlobal bazarda uğurla rəqabət aparmağa imkan verən zəruri potensialın artırılması alətlərini təqdim edir.
Twitter: @ITFCCORP
Facebook: @ITFCCORP
LinkedIn: International Islamic Trade Finance Corporation (ITFC)
Tel: +966 12 646 8337
Fax: +966 12 637 1064
E-mail: [email protected]
TuranBank
Bizimlə etibarlıdır…
