“İslahatçı Gənclər” İctimai Birliyinin dəvəti ilə Bakıda səfərdə olan İstanbul Türk Ocağı Gənclik Qolları başqanı Barış Onur Sarqın və Türk dünyası üzrə koordinator Almıla Maraş görüşlərini davam etdirir.
Bu barədə məlumatı “İslahatçı Gənclər” İctimai Birliyinin sədri Fərid Şahbazlı verib. Onun sözlərinə görə, qonaqlar Türkiyə-Azərbaycan Parlamentlərarası Dostluq Qrupunun rəhbəri, Atatürk Mərkəzinin direktoru Nizami Cəfərov, qrupun üzvləri olan millət vəkilləri Qənirə Paşayeva, Musa Qasımlı, İqbal Məmmədovla görüşüblər. Görüşlərdə Türkiyə-Azərbaycan münasibətlərində gəncləri rolu və əlaqalərin daha genişləndirilməsi məsələləri müzakirə olunub.
Qonaqlar daha sonra Xarici İşlər Nazirliyinin Mətbuat katibi Elman Abdullayev və Yeni Azərbaycan Partiyası Gənclər Birliyinin sədri Seymur Orucovla görüşüblər. Görüşlərdə Azərbaycanla Türkiyənin strateji müttəfiq və qardaş ölkələr olduğu qeyd olub. Bildirilib ki, iki ölkə gənclərinin aktiv əməkdaşlığı, birgə layihələrlə çıxış etməsi olduqca önəmlidir.
İstanbul Türk Ocağı Gənclik Qolları Türk dünyası üzrə koordinatoru Almıla Maraş qarşıdakı günlərdə görüşlərin davam edəcəyini və Bakı səfərindən razı qaldığını söyləyib: “Bakı olduqca gözəl və müasir şəhərdir. Azərbaycan qısa müddətdə olduqca sürətli inkişaf edib və bu inkişaf bizi çox sevindirir. Azərbaycanda reallaşdırılan dövlət gənclər siyasəti isə bir çox ölkələrə örnək olacaq səviyyədədir”.
